DILI, 18 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 ba munisípiu sira iha faze espesialidade.
Deputadu sira halo votasaun orsamentu kada munisípiu ne’ebé hahú husi Aileu, Ainaro, Ataúro, Baucau, Bobonaro, Covalima, Dili, Ermera, Laútem, Liquiça, Manatuto, Manufahi no Viqueque, ho rezultadu votasaun ne’e maiória afavór ho votu 43 no 42.
“Orsamentu ba munisípiu sira pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 faze espesialidade, segunda ne’e.
Enkuantu, montante orsamentu ba kada munisípiu husi millaun $2-resin to’o millaun $19-resin.
Husi orsamentu ne’e hodi finansia programa sira mak hanesan desentralizasaun administrativa no podér lokál, programa estrada no ponte, programa dezenvolvimentu rurál no urbanu, programa seguransa nasionál, programa transporte, programa funsionamentu no dezenvolvimentu instituisionál, programa edukasaun pre-eskolár.
Nune’e mós programa ensinu báziku, programa ensinu rekorrente, programa kuidadu saúde primáriu, programa bee no saneamentu, programa inkluzaun sosiál, programa turizmu.
Programa investimentu no diversifikasaun ekonómika, programa agrikultura, ortikultura, kafé no planta industrial no anuais, programa pekuária, veterinária no teknolójia.
Dezenvolve kapasidade munisípiu
Deputadu PD, Antonio da Conceição “Kalohan’, dehan iha 2025 sai tinan implementasaun nune’e sujere oinsá Ministériu Administrasaun Estatál (MAE) tau matan makaas duni ba andamentu iha munisípiu sira, liuliu atu reforsa sira-nia kapasidade planeamentu, identifikasaun problema, baze populasaun tomak iha ne’eba hela ne’ebé ita iha nasionál ne’e halo mós reprezentasaun.
“Tanba ne’e sujere halo esforsu másimu ba estudu komparativu sira-ne’ebé halo tenke transforma ona iha asaun ruma konparasaun ruma iha ita-nia rain, la’ós atu kópia, mais pelumenus ideia saida mak ita bele lori ba iha munisípiu sira,” nia dehan.
Tanba ne’e, hanoin votu orsamentu ba munisípiu nafatin fó votu ida favoráve, no liuliu munisípiu rua (2) ne’ebé iha fronteira tenke atensaun espesiál, nune’e presiza reforsa munisípiu rua entermu atu sai oinsá, polu dezenvolvimentu ita tenke hahú hanoin.
Nune’e, fó hanoin atu tau atensaun makaas atu dezenvolve kapasidade munisípiu nian liuliu kapasidade lideransa atu sira iha responsabilidade iha munisípiu ninian.
Deputada CNRT, Virginia Ana Belo, fó hanoin katak lixu iha Dili kontinua barak, nune’e autoridade presiza kontrolu lixu no tenke iha sansaun ba infratór sira.
Deputada FRETILIN, Lidia Norberta, preokupa ba funsionáriu kazuál iha munisípiu númeru boot.
Ministru Administrasaun Estatál (MAE), Tomas do Rosário Cabral, hateten iha dezembruGovernusei halo avalisaun minima ba munisípiu hotu no tinan 2025 hahú halo destakamentu iha munisípu sira, tanba ne’e orsamentu sira-nian tau ketak iha ne’e, no sei iha tempu badak mós sei aprezenta fila-fali alterasaun da-haat kona-ba prosesu implementasaun podér lokál haruka ba Konsellu Ministru.
Kona-aba rekrutamentu funsionáriu kazuál, nia dehan, sira hanoin munisípiu sira iha autonomia finansia no administrativa, nune’e deputadu sira iha kna’ar fiskalziasaun iha terrenu bele haree.
Jornalista : Nelson de Sousa
Editór : Cancio Ximens
