DILI, 18 novembru 2024 (TATOLI)—Parlamentu Nasionál (PN),s egunda ne’e, aprova proposta Orsamentu Jerál Estadu (OJE) 2025 ho montante $10,938,078 ba Ministériu Defeza (MD) iha faze espesialidade ho votu afavór 44, kontra 0 no abstensaun 20.
“Ne’ebé, orsamentu MD pasa,’’ Prezidente Parlamentu Nasionál, Maria Fernanda Lay, fó sai iha debate proposta OJE 2025 iha faze espesialidade.
Proposta OJE 2025 MD hamutuk $10,938,078 ne’e aloka ba saláriu vensimentu $3,086,253, bens no serbisu $7,051,825, kapitál dezenvolvimenti rihun $800.
Programa defeza nasionál ho sub-programa defeza militár ho nia atividade 10, sub-programa formasaun no dezenvolvimentu rekursu unamu iha área defeza no seguransa ho atividade ida (1).
Programa funsionamentu no dezenvolvimentu instituisionál ho sub-programa rua no atividade sira.
Programa inkluzaun sosiál ho sub-programa implementasaun NAP-rezolusaun 1325 ONU kona-ba WPS, ho atividade ida (1).
Orsamentu F-FDTL $35,697,792 pasa
Iha debate ne’e, Parlamentu Nasionál aprova mós proposta orsamentu ba FALITINL Forsa Defeza Timor-Leste (F-FDTL) hamutuk $35,697,792 ho votu afavór 44, kontra 0 no abstensaun 20.
Proposta OJE 2025 ba F-FDTL hamutuk $35,697,792 ne’e aloka ba saláriu vensimentu $19,145,445, bens no serbisu $16,052,347, kapitál menór rihun $500.
Husi orsamentu ne’e hodi finansia programa defeza nasionál ho sub-programa defeza militár ho nia atividade tolu, sub-programa rekursu umanu ba prestasaun serbisu ho atividade ida (1).
Programa funsionamentu no dezenvolvimentu instituisionál ho sub-programa rua (2) atividade tolu (3).
Programa inkluzasaun sosiál ho sub-programa implementasaun NAP-rezolusaun 1325 ONU kona-ba WPS ida (1).
Deputadu KHUNTO, Luis Roberto, konsidera orsamentu ba defeza nian merese aumenta, ba oin halo responde atividade forsa defeza.
Deputadu FRETILIN, Florentino Ximenes , preokupa ho peska ilegál iha tasi kada tinan Timor-Leste lakon ikan 2.8 millaun nune’e presiza kontrola.
Deputada KHUNTO, Olinda Guterres, husu tau atensaun ba iha F-FDTL kona-ba alimentasaun, fasilidade transporte.
Ministru Defeza, Pedro Klamar Fuik, hato’o apresiasaun no preokupasaun deputadu sira-nian maibé orsamentu ne’ebé iha sufisiente atu jere nesesidade no prioridade ne’ebé iha.
Jornalista : Nelson de Sousa
Editór : Cancio Ximenes
