DILI, 18 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 hamutuk $4,316,909 ba Ministériu Planeamentu no Investimentu Estratéjiku (MPIE) iha faze espesialidade ho votu afavór 42, kontra 11 no abstensaun 11.
“Orsamentu MPIE pasa,’’ Prezidente Parlamentu Nasionál, Maria Fernanda Lay, fó sai iha debate proposta OJE 2025 faze espesialidade, segunda ne’e.
Orsamentu ho totál hamutuk $4,316,909 ne’e aloka ba saláriu vensimentu $ 2,636,773, bens no serbisu $1,630,136 no kapitál menór hamutuk rihun $50.
Orsamentu ne’e finansia programa jestaun finansa públika ho sub-programa banku dezenvolvimentu Timor-Leste ho atividade ida (1).
Programa funsionamentu no dezenvolvimentu instituisionál ho sub-programa tolu (3) no atividade ualu (8).
Programa inkluzaun sosiál ho sub-programa deklarasaun Maubissei ho atividade ida (1).
Programa ordenamentu territóriu ho sub-programa dezenvolve polítika ordenamentu territóriu ho atividade ida (1), sub-programa dezenvolvimentu no koordenasaun iha ezekusaun instrumentu planeamentu urbanu iha atividade tolu (3), sub-programa asegura planu no propor polítika nasionál ordenamentu territóriu no dezenvolvimentu territóriu ho atividade rua (2), sub-programa promove no difundir informasaun jeográfika no kartográfika ho atividade tolu (3).
Programa planeamentu no investimentu estratéjiku ho sub-programa planeamentu estratéjiku sósiu-ekonomiku ho atividade tolu (3), sub-programa investimentu estratejiku ho atividade ida (1).
Jornalista : Nelson de Sousa
Editór : Cancio Ximenes
