DILI, 18 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 hamutuk $47,239,935 ba Ministériu Petróleu no Rekursu Minerál (MPRM) iha faze espesialidade ho votu afavór 42, kontra haat (4) no abstensaun 18.
“Ho nune’e, orsamentu MPRM pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 iha faze espesialidade iha lron da-lima, segunda ne’e.
Proposta OJE ho montante $47,239,935 ne’e aloka ba saláriu vensimentu $3,081,336, bens no serbisu $19,158,599 no transferénsia públika millaun $25.
Husi orsamentu ne’e, atu finansia programa funsionamentu no dezenvolvimentu institusionál ho sub-programa tolu (3) no atividade 15.
Programa dezenvolvimentu kampu gás greater sunrise no asegura gazodutu ho sub-programa negosiasaun no dezenvolve estudu no inisiativa relevante hodi asegura gazodutu greater sunrise no kampu sira seluk mai Timor-Leste ho atividade haat (4).
Programa dezenvolve polítika boa prátika iha industria hodi asegura partisipasaun másima timorense iha atividade setór ho programa dezenvolvimentu polítika, lejislasaun no regulamentu iha setór ho atividade lima (5), sub-programa apoiu no fortifikasaun instituisaun tutela ho atividade tolu (3), sub-programa implementasaun inisiativa transparánsia indústria estrativa ho atividade tolu (3).
Programa implementasaun projetu tasi-mane ho sub-programa dezenvolve inrfaestrutura apoiu projetu tasi-mane ho atividade haat (4), sub-programa dezenvolvimentu integradu instalasaun prosesamentu petróleu no gás naturál ho atividade haat (4).
Programa esplora no investiga no dezenvolve rekursu petrolíferu, minerál no jeolójiku ho sub-programa esplorasaun no dezenvolvimentu poténsia bloku esplorasaun petrolífeira iha onshore, no offshore iha Timor-Leste ho sub-programa tolu (3) no atividade tolu (3), sub-programa esplorasaun no dezenvolvimentu pontensiál bloku explorasaun mineira iha territóriu nasionál ho atividade tolu (3), sub-programa promove no fortalese estudu tékniku no sientífiku ponténsia rekursu no no risku jeolójiku ho atividade tolu (3).
Jornalista : Nelson de Sousa
Editór : Cancio Ximenes
