DILI, 18 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 ba instituisaun judisiáriu sira hanesan tribunál iha faze espesialidade ho nia orsamentu $4.670.395 ho votu afavór 42, kontra 0 no abstensaun 22.
“Orsamentu Tribunál pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 iha faze espesialidade ba loron da-lima, segunda ne’e.
Proposta OJE Tribunál hamutuk $4.670.395 ne’e aloka ba saláriu vensimentu $3.454.572, bens no serbisu $925.823 no kapitál menór rihun $290.
Husi orsamentu ne’e, atu finansia programa aproxima serbisu tribunál ba populasaun, programa asesu justisa no programa funsionamentu no dezenvolvimentu institusionál.
Orsamentu ba PJR pasa
Aleinde ne’e, Parlamentu Nasionál (PN) aprova mós orsamentu na Prokuradória Jerál Repúblika (PJR) hamutuk $4.223.437 ho votu afavór 42, kontra ida )1) no abstensaun 21.
Hosi orsamentu ne’e, hodi aloka ba saláriu vensimentu $3.277.759, bens no serbisu $905.678 no kapitál menór rihun $40.
Orsamentu ne’e, atu finansia programa asesu justisa no funsionamentu no dezenvolvimentu instituisionál.
Orsamentu ba Denfensória Públika aprovadu
Entretantu, iha debate ne’e, Parlamentu Nasionál aprova orsamentu ba Defensória Públika hamutuk $1.717.730 ho votu afavór 43, kontra haat (4) no abstensaun 17.
Husi orsamentu hamutuk $1.717.730 ne’e aloka ba saláriu vensimentu $1.590.971, bens no serbisu $126.759.
Orsamentu ne’e, finansia ba programa asesu justisa no programa funsionamentu no dezenvolvimentu instituisionál.
Orsamentu ba PDHJ pasa
Nune’e mós, Parlamentu Nasionál aprova orsamentu ba Providória no Direitu Umanu no Justisa (PDHJ) hamutuk $2.139.368 ho votu afavór 42, kontra rua (2) no abstensaun 20.
Husi orsamentu ne’e aloka ba saláriu vensimentu $1.402.463, bens no serbisu $696.905 no kapitál menór rihun $40.
Orsamentu ne’e finansia ba programa direitu umanu no boa-governasaun, programa funsionamentu no dezenvolvimentu instituisionál.
Orsamentu ba IJE
Parlamentu Nasionál, aprova orsamentu ba Inspesaun Jerál Estadu (IJE) hamutuk $923.919 ho votu afavór 42, kontra rua (2) no abstensaun 21.
Oramentu ne’e aloka ba saláriu vensimentu $577.888 no bens no serbisu hamutuk $346.031.
Orsamentu ne’e hodi finansia ba programa funsionamentu no dezenvolvimentu instituisionál
Orsamentu ba PCIC
Parlamentu Nasionál aprova orsamentu ba Polísia Sientífika Investigasaun Kriminál (PCIC, siglá portugés) hamutuk $2.184.301 ho afavór 42, kontra ualu (8) no abstensaun 14.
Orsamentu ne’e aloka ba saláriu vensimentu $1.351.538, bens no serbisu hamutuk $832.763.
Orsamentu ne’e finansia ba programa asesu justisa no programa funsionamentu no dezenvolvimentu instituisionál.
Orsamentu ba SNI
Parlamentu Nasionál aprova mós orsamentu Serbisu Nasionál Intelejénsia (SNI) hamutuk $2.642.443 ho votu afavór 44, kontra 0 no abstensaun 20.
Orsamentu ne’e aloka ba saláriu vensimentu hamutuk $1.094.967, bens no serbisu $1.224.976 no kapitál menór hamutuk $322.500.
Orsamentu ne’e finansia programa seguransa nasionál no programa funsionamentu no dezenvolvimentu instituisionál.
Jornalista : Nelson de Sousa
Editór : Cancio Ximenes
