COVALIMA, 18 Novembru 2024 (TATOLI) – Polísia Nasionál Timor-Leste (PNTL) Covalima transporta kadáver Estevão Alves, tinan 46, bá Ospitál Nasionál Guido Valadares (HNGV, sigla portugés) hodi halo autópsia.
Mate-isin Estevão Alves ne’e komunidade hetan iha domingu, iha loron 17, iha aldeia Orun, suku Ogues, postu administrativu Maucatar.
Komandante PNTL Covalima, Superintendente Polísia Calisto Gonzaga, informa katak polísia simu informasaun pur volta tuku 15:00, katak komunidade hetan mate-isin iha aldeia Orun.
Nia adianta katak daudaun ne’e seidauk hatene kauza husi nia mate, tanba iha hela prosesu investigasaun.
“Hafoin simu informasaun ita-nia polísia sira tun bá iha fatin akontesimentu no identifika sidadaun ho situasaun kanek. Ita mós hetan evidénsia sira hanesan diman no motór balun”, Calisto Gonzaga realsa iha Santa Rosa, ohin.
PNTL mós daudaun investiga hela sidadaun na’in-haat ne’ebé hamutuk ho Estevão Alves bainhira bá tuda fahi ne’ebé durante ne’e tama matebian nia to’os. Polísia mós asegura ona sidadaun na’in-haat ne’e iha sela detensaun, tanba deskonfia nain-ida ho inisiál JBM ne’ebé konfesa ona.
“Ita deskonfia halo diskuidu husi soe diman ba iha du’ut ne’ebé book aan, hanoin fahi maibé vítima mak tama iha du’ut laran. Entaun, kuandu diman soe ba laran, la espera atu kona ema. La kle’ur matebian sai ho diman dehan imi mai haree ha’u, diman kona ha’u”, komandate ne’e konta.
Ema na’in-haat ne’ebé hamutuk ho matebian Estevão Alves ho inisiál mak hanesan AG, AG, SL no JBM.
“Sidadaun na’in haat, tolu ita tenta hela atu sai sasin tanba sira la kaer buat ruma, maibé sira akompaña hela. Na’in-rua mak lori kro’at mak matebian ne’e rasik, ne’ebé lori ho diman, ida JBM mós kaer diman. Ita deskonfia maka’as no nia rasik mós konfesa dehan ha’u laiha intensaun”, nia relata.
Médika Jerál Emerjénsia Ospitál Referénsia Suai, Sadra Pacheco, dehan ospitál simu matebian Estevão nia isin mate iha tuku 17:03 husi Polísia Investigasaun Kriminál no presiza halo ezaminasaun fízika.
“Hafoin simu informasaun ha’u halo ezaminasaun fízika. Husi parte pozitivu ne’ebé ha’u halo ezaminasaun, iha parte kotuk no ain la hetan fitar ruma, iha parte isin-lolon tomak no husi parte oin loos ita hetan kanek naklees iha kuluna superiór mais ou menus séntimu tolu no uza lima fuan hatudu [kanek] la kle’an liu séntimu 10”, nia informa.
Aleinde ne’e, kanek parte kalavíkula loos hetan kanek naklees séntimu tolu ho nia kle’an sentímetru 10.
Jornalista: Celestina Teles
Editora: Maria Auxiliadora
