COVALIMA, 18 Novembru 2024 (TATOLI) – Sekretáriu Estadu Formasaun Profisionál no Empregu (SEFOPE), Rogério Araújo Marçal, lansa fatuk dahuluk ba konstrusaun sentru formasaun dalen inglés, iha aldeia Lakonak, suku Debos, postu administrativu Suai-Covalima.
“Ohin, ita halo lansamentu fatuk inan atu konstrui fatin formasaun lia-inglés ba joven sira iha Covalima. Atu garante kualidade formasaun hodi hatán ba merkadu traballu presiza iha kondisaun”, governante ne’e hato’o iha nia dirkursu.
Nian husu ba badaen sira tenke garante kualidade obra no serbisu ho responsabilidade. Badaen sira ne’ebé ka’er obra ne’e mak estudante estajiáriu ne’ebé tuir formasaun iha sentru formasaun hodi bele kria mós empregu ba sira-nia aan.
SEFOPE hala’o knaar bazeia ba dekretu-lei númeru 80/2023, 11 Outubru, iha área importante sira mak hanesan formasaun kualidade maka presiza iha fatin formasaun ne’ebé dignu ,tanba joven barak hafoin finaliza eskola sekundária hakarak tuir kursu iha Dili.
Tanba ne’e, politíka Governu nian lori sentru formasaun bá iha munisípiu atu fasilita joven sira bainhira remata estudu la presiza bá nasionál, maibé bele hetan oportunidade hodi tuir formasaun iha munisípiu hodi asesu ba merkadu traballu.
“Oinsá ita bele kria formasaun? Ita bele konstrui fatin formasaun ne’ebé ho kualidade tuir padraun ne’ebé merkadu presiza. Iha faze dahuluk, ita loke uluk formasaun dalen inglés, koreia, japaun no serbisu hamutuk ho F-FDTL na’in-40 iha espesialidade dalen japaun, nune’e sira bele fó formasaun ba joven-sira. Ko’alia kona-ba empregu, SEFOPE mak fasilita formasaun no halo rekrutamentu no sai hanesan ajénsia haruka traballadór serbisu iha rai-li’ur”, dehan.
Diretora-Ezekutiva Sentru Formasaun Becora, Bernardete Miranda Pinto, informa katak konstrusaun sentru formasaun dalen inglés ho nia medida 27×8,5 ho saladeuala tolu kompleta ho hariis-fatin rua.
Formandu ne’ebé konstrui sentru formasaun ne’e hamutuk na’in-10, neen mai husi F-FDTL ne’ebé tuir formasaun iha área konstrusaun sivíl iha nivel sertifikadu III hodi kompleta sira-nia estudu.
Orsamentu ba konstrusaun sentru ne’e hamutuk rihun $78, ne’ebé mai husi Orsamentu Jerál Estadu 2024 no sei konstrui durante fulan tolu, hahú loron 13 Novembru no termina iha tinan oin.
Reprezenta Prezidente Autoridade Covalima, Caetano Robeiro, satisfeitu tanba formandu husi grupu tékniku profisionál mak halo konstrusaun ba sentru ne’e.
“Autoridade mós iha reponsabilidade atu koopera no presiza halo fiskalizasaun, nune’e bele finaliza lalais prosesu konstrusaun sentru formasaun dalen inglés”, dehan.
Jornalista: Celestina Teles
Editora: Maria Auxiliadora
