DILI, 18 novembru 2024 (TATOLI)–Vitima sira-ne’ebé lakon iha masakre 12 Novembru 1991 iha semitériu Santa Crúz ne’e to’o ohin loorn ema 30-resin mak Komite 12 Novembru seidauk bele hetan sira-nia restu mortál ka rate total vítima hamutuk 70 ne’e.
Prezidente Komité 12 Novembru, Gregorio Saldanha, hateten la fásil no mistériu idaké la’ós Komite 12 Novembru mak seidauk rezolve ida, tanba inimigu sira oho timoroan hodi soe lakon iha fatin ne’ebé.
“Iha fatin seluk ema seidauk mai rejista, ema 30 ka besik 40 hanesan ne’e mak seidauk hetan sira-nia rate ka restu mortál husi totál vitima hamutuk 70 ne’ebé mai rejista iha Komité 12 Novembru,” Prezidente Komité 12 Novembru ne’e hateten.
Nia esplika, esforsu ida Estadu nia serbisu mak tenke iha koordenasaun Governu ba Governu, maske Komité 12 Novembru bele halo aproximasaun informal maibé ida formál ne’e Governu mak tenke halo hanesan Governu Timor-Leste ho Indonézia atu buka solusaun ba ida-ne’e.
Família ho Komité 12 Novembru ida-deít, hamutuk kontinua buka no hein informasaun husi família ka la’ós família, hateten katak mate hakoi iha ne’ebá maibé tenke iha evidénsia, tanba labele siik de’it.
“Ami iha esperiénsia ladi’ak, informasaun la loos no matan dook sira sik naran de’it. Tanba buat sira-ne’e, ami halo esforsu barak ona laiha rezultadu,” nia hateten.
Nia dehan, ida hakoi formál ne’ebé la’o iha semiteriu Hera nian ne’e Komite 12 Novembru hetan ona restu mortal 14 no identifikadu ema12 ne’ebé entrega ba familia, no iha mós hetan ruin iha foho Nasuta-Manatuto hodi kee iha ne’ebá no tau iha ona iha Hspital Nasionál Guido Valadares maibé seidauk identifikadu.
“Teste sira-ne’e, ita servisu hamutuk ho forensik Austrália ho Argentina halo teste identifikadu ba teste laboratóriu no ita fó hatene família hodi haloot,” Gregorio Saldanha hateten.
Responsável ne’e dehan, Komité 12 Novembru mós hetan ema na’in-sia (8) iha estatua João Paulo II nia kotuk, maibé haree maluk sira-ne’e balun nia restu mortal tau roupa FALINTIL nian no uza kapasete no ema kesi sira-nia liman metin hotu, dalaruma ne’e vítma husi levantamentu Marabia bele ba oho iha ne’ebá, ruin sira tau hamutuk iha ne’ebá.
Jornlista : Jesuína Xavier
Editór : Cancio Ximenes
