DILI, 19 novembru 2024 (TATOLI) – Asosiasaun Jornalista Timor-Leste (AJTL) hamutuk ho Oxfam realiza media tour durante loron tolu kona-ba mudansa klimátika iha Suku LauAna no Suku Katrai Kraik iha Postu Administrativu Letefoho, Munisipiu Ermera.
“AJTL hamutuk ho media sanulu resin lima halo media tour ba iha Letefoho ho objetivu atu foka liu ba mudansa klimátika tanba populasaun sira durante ne’e moris ho kafé, entaun ami mós halo ona media briefing ba jornalista sira oinsa atu identifika isu mudansa klimátika ne’ebé inan aman sira enfrenta”, Koordenadór ba Programa AJTL, Acacio Pinto dehan ba jornalista sira iha edifísiu OXFAM Hudi-Laran, ohin.
Nia afirma, ho media tour ida-ne’e ajuda komunidade sira oinsa identifika sira-nia problema nune’e hato’o ba ministériu relevante sira atu tau atensaun.
Iha fatin hanesan, Adilson da Costa Junior, hateten OXFAM Timor-Leste servisu hamutuk ho Asosiasaun jornalista Timor-Leste(AJTL) hodi realiza programa media tour ida-ne’e atu haree liu ba mudansa klimátika ne’ebé inan aman sira hasoru iha Suku Lauana no Suku Katrai Kraik iha Postu Administrativu Letefoho, Munisípiu Ermera.
“Ha’u hanoin importante tebes, ita boot sira halo kobertura kona-ba asuntu importante sira dalabarak ita-nia maluk sira enfrenta iha área rurál, informasaun hotu dalaruma iha Dili de’it, dalaruma ita mós lakon informasaun husi ema defisiénsia no maluk sira ne’ebé hela iha área rurál ne’eba enferenta, programa media tour ba dala tolu, iha tinan ida-ne’e deside halo iha munsípiu Ermera parte Letefoho, asuntu importante balun ita koalia iha briefing ne’e impaktu mudansa klimátika ne’e ba produsaun agrikultura, ba produsaun kafe rasik inklui bee moos”, nia konklui.
AJTL servisu hamutuk ho OXFAM Timor-Leste ne’ebé hetan apoiu finanseiru husi Oxfam Honkong.
Jornalista : Felicidade Ximenes
Editór : Zezito Silva
