COVALIMA, 19 Novembru 2024 (TATOLI) – Servisu Munisipál Edukasaun Covalima koloka ona manorin rekrutadu faze datoluk hamutuk na’in-32 bá eskola sira iha munisípiu Covalima.
Diretora Edukasaun Covalima, Elda de Fátima, dehan profesór 32 ne’e aprezenta aan ona iha loron 11 Novembru, depoizde aprezentasaun destaka kedas profesór sira bazeia ba lista rekrutamentu, nune’e balun hahú ona hala’o serbisu.
“Ita koloka tan ona profesór sira rekrutadu faze datoluk ni’an bá eskola sira hanesan pré-eskolár, ensinu báziku primeiru no segundu siklu, nomós terseiru siklu iha Covalima”, Elda de Fátima relata iha Santa Rosa, ohin.
Dirijente ne’e salienta katak Ministériu Edukasaun koloka ona profesór sira iha munisípiu, maibé eskola sira iha Covalima nafatin falta manorin sira, tanba balun moras permanente no balun idade reforma hamutuk 200-resin.
“Eskola-sira iha Covalima nafatin falta manorin na’in-sira, tanba Ministériu Edukasaun foin koloka profesór husi faze dahuluk to’o datoluk hamutuk na’in-56 hodi preinxe fatin mamuk, maibé seidauk troka profesór sira moras no idade reforma”, nia afirma.
Manorin na’in-32 ne’e destaka bá ia Eskola Bázika Sentrál (EBC) Bulu ho filiál sira no EBC Beilaku ha postu administrativu Zumalai, EBC Salele iha Tiloma, EBC Lontale iha Suai, Eskola Bázika Filiál (EBF) Mota Ulun iha Fatumea no EBF Lawakou iha Fohorem.
Notísia relevante: Edukasaun Covalima koloka ona manorin bá eskola sira iha área rurál
Jornalista: Celestina Teles
Editora: Maria Auxiliadora
