COM, 18 novembru 2024 (TATOLI) – Problema Mudansa Klimátika sai preokupasaun ba ema hotu no sai ona hanesan problema mundiál ne’ebé nasaun hotu preokupa oinsá bele buka alternativa hodi luta hasoru mudansa sira ne’ebé akontese iha nasaun hotu.
Timor-Leste hanesan nasaun ida ne’ebé sempre hasoru problema ba Mudansa Klimátika ne’ebé akontese hanesan tempu udan, bailoron naruk hodi afeta ba agrikultór no peskadór sira laiha produsaun di’ak.
Ida-ne’e mak realidade ida iha komunidade Suku Com, ne’ebé maioria ho atividade, nu’udar vida agrikultór hanesan halo to’os no hakiak animál, hanesan atividade diáriu komunidade sira ne’ebé hela iha tasi-ibun Com nian implika tebes ba atividade peska nian.
Moris komunidade nian, loron ba loron sempre iha mudansa tuir Mudansa Klimátika ne’ebé iha hodi fó impaktu ba atividade peska ne’ebé halo kuantidade ikan menus. Ho tempu Mudansa Klimátika ne’ebé iha tempu bailoron naruk ne’ebé akontese halo anin boot, halo peskadór sira labele hala’o atividade peska ho di’ak,
Peskadór preokupa ho Mudansa Klimátika, tinan ida, peska de’it iha fulan tolu
Komunidade lokál mós preokupa ho Mudansa Klimátika, iha tinan ida, peska de’it iha fulan tolu iha Suku Com, Postu Administrativu Lautem, Munisípiu Lautem. Peskadór Fabião da Cruz, hateten kondisaun klima sempre muda tuir tempu ne’ebé iha, nune’e iha tinan ida nia-laran, peskadór sira ativa tuun ba tasi mak iha fulan-Outubru, Novembru no Dezembru, tanba tasi ho anin ne’ebé di’ak halo sira tuun tasi hodi peskas, enkuantu husi Janeiru to’o Setembru sira, anin boot mosu hodi difikulta sira halo peska.
“Tempu agora tasi di’ak, loroloron kolega peskadór sira bele hala’o peska husi Com to’o ba Jaco, Lore no Ilomar, ami ba to’o iha ne’eba bele loron rua bele loron ida no kuantidade ikan bele to’o 300 kg to 400 kg. Fabiao Da Cruz hanesan Peskadór iha Suku Com ba jornalista sira iha ámbitu kobertura munisipal ka Rural News ne’ebé organiza husi Organizasaun Timor-Leste Press Union segunda ne’e, iha Tasi-Ibun Com Lautem.
Peskadór ne’e hateten, ho mudansa tempu ne’ebé iha no peskadór sira kontinua hala’o atividade peska, nune’e ikan sira iha parte tasi Com nian menus, obriga sira peska sai husi Com to tasi mane tanba ikan barak iha fatin hirak ne’eba.
Fabião haktuir, ho mudansa klimátika ne’ebé iha no bailoron naruk halo tasi la hakmatek no anin boot atu sira labele tuun tasi no ladún hetan kuantidade ikan ne’ebé iha.
“Iha diferente iha tempu bailoron naruk tasi ladún hakmatek kompara tinan kotuk ho tinan agora, ikan ladún tanba tinan ne’e peskadór sira ba peska hotu maibé ladún hetan ikan tanba tasi, anin boot ne’ebé ladún hakmatek, tinan kotuk sira ne’e tasi hakamatek los hateten Peskadór Com ne’e.
Ho ikan ne’ebé peskadór sira hetan kontinua faan ba komunidade sira iha Suku Com, atu nune’e mós fatin sira seluk hanesan Lautem, Lospalos no kontinua faan to Dili.
Kolektór dadus peska ba espesie no kuantidade ikan
Pesoal koletór dadus iha sentru peskadór Suku Com, Gilberto do Carmo, husi Diresaun Nasionál Peska, Ministériu Agrikultura Peskas Pekuaria no Floresta, hateten Peskadór ihA Com, sira tama iha Tipu Peska ArtezenÁl ho redi no ró ho kapasidade naruk, metru hitu, uza hodi peska.
“iha ne’e tipu peskadór sira tama iha Peska Artezenál ho ró kapasidade metru hitu hodi uza ba peska, uza rede kail no luku hodi tiru ikan no atividade peska ho modelu tradisionál, hateten koletór dadus peska nian.
Pesoál koletór ne’e Aafirma, tipu ikan sira peskadór hetan mak hanesan ikan demersál no pelásiku no sira nia atividade depende ba klima ne’ebé iha.
“Iha ne’e sira hetan ikan demersál no pelásiku ou dehan ikan dasar no permukan, ikan dasar mak hanesan ikan mean, kumeran, karungu ba fali ikan pelájiku mak sumber, combo layan, no sira-nia rendimentu depende fali ba époka agora daudaun, époka ida-ne’e outubru, novembru no dezembru komesa tasi di’ak, sira komesa kaer husi Com to’o Lore no Ilomar’’, Gilberto do Carmo dehan.
Nia hatutan, ekipamentu sira ne’ebé ekipa koletór sira utiliza mak tableta ne’ebé instala hotu ho pergunta sira ho sistema ne’ebé instala mak sistema peska.
“Durante ne’e ami uza tableta hodi foti dadus no pergunta sira instala hotu ona iha sistema laran no sistema ne’e hanaran sistema peskas ho époka ne’ebé tasi di’ak sira komesa kail husi Com ba Lore to’o Ilomar, dalaruma sira mai ne’e ró ida bele hetan 400 kilo no 300 kilo, uluk ne’e ró haat ou lima bele hetan ikan to’o 400 kilo maibé ikus-ikus ne’e ró ida ou rua de’it mak hetan to’o 400 kilo, ne’e másimu liu ona, hateten koletór dadus ne’e.
Gilberto do Carmo afirma, dadus hirak ne’ebé sira foti utiliza tableta no kaderneta hodi foti dadus husi peskadór sira kona-ba ikan saida mak sira foti, sira uza saida mak ba espésie saida mak sira foti, sira faan karik ba folin hira, nia rendimentu loron ida hira.
Autridade lokál rekoñese klima ladún di’ak, kada tinan peska ikan tonelada rua
Xefe Suku Com, Sergio Jose Cristovão, afirma komunidade Com dalaruma iha klima ne’ebé di’ak sempre kail ikan to’o iha Tutuala, Lorehe, Iliomar no mós to’o iha tasi Viqueque nian.
“Ba peska nian, klaru iha ne’e, lorloron buka ikan iha tasi to’o Tutuala, Lore to’o iha Viqueque iha ne’eba foti ikan hanesan sustentabilidade ida hodi sustenta hela ba família no grupu nian nune’e mós sira-nia peska kada tinan bele hetan ikan husi tonelada ida to’o tonelada rua hodi faan no sustenta família’’, Xefe Suku Com dehan.
Autoridade lokál Com ne’e haktuir liután, iha Suku Com, iha Aldeia ne’en iha Aldeia tolu hala’o moris ho vida agrikultura hanesan halo toos no Aldeia tolu iha tasi ibun foku ba atividade peskas nian.
Suku Com iha aldeia ne’en mak hanesan Aldeia Wailowaia, Muapusso, Lohomatu, Etepiti, Pitileti no Ira-Ono ho pupulasaun hamutuk 3811, Xefe Família 881 no Suku Com ho nia Luan 48.42
Jornalista : Anito Soares
Editór : Zezito Silva
