DILI, 19 novembru 2024 (TATOLI)— Ministru Juventude, Desportu, Arte, no Kultura (MJDAK), Nelyo Isaac Sarmento, partisipa iha XV Konferénsia Ministru Juventude no Desportu Komunidade Ko’alia Lian Portugés (CPLP-sigla portugés), hodi toka asuntu importante kona-ba pozisaun Timor-Leste nian iha polítika hametin kompromisiu ba juventude no desportu.
Konferénsia ne’e hahú husi loron 12 to’o 16 Novembru 2024 iha sidade Cascais,Portugál. Eventu ne’e konvoka ministru sira husi Estadu membru CPLP sia hodi hasa’e kooperasaun no fahe esperiénsia iha kampu sira juventude no desportu nian.
Marka signifikativu ida husi konferénsia, ne’ebé hala’o iha loron 14 Novembru, maka adosaun husi deklarasaun finál, ne’ebé subliña rezolusaun oioin ho impaktu ne’ebé dook ba Timor-Leste no ba foin-sa’e sira iha nasaun sira CPLP nian.
Entre destake sira maka aprovasaun ba rezolusaun ida hodi estabelese “Olimpíada Desportu Eskolár CPLP nian”, inisiativa ida ne’ebé propoin husi Cabo Verde. Inisiativa ida-ne’e sei hetan deliberasaun liután iha Dili durante reuniaun Komisaun Desportu nian iha tinan 2025.
“Konferénsia ne’e mós reafirma kompromisu koletivu husi membru CPLP sira atu sai uma-na’in ba XII Jogu Desportu CPLP nian iha Timor-Leste hahú husi loron 17 to’o 27 Jullu tinan 2025. Estadu-membru sira promete sira-nia apoiu hodi garante prontidaun téknika, materiál, no finanseira ne’ebé presiza ba susesu jogu nian,” tenik iha nota ne’ebé Agência TATOLI asesu hosi media MJDAK, ohin.
Iha biban hanesan, Sekretáriu Ezekutivu CPLP, Zacarias da Costa, hateten papél sentrál juventude no desportu nian hodi haburas dezenvolvimentu sustentável iha Estadu-membru sira.
“Envolvimentu ativu husi joven sira maka fundamentál atu atinji sosiedade sira ne’ebé sustentável, inkluzivu, no estável,” Zacarias tenik iha nota ne’e.
Zacarias hatutan tan iha nota ne’e, “destaka liután desportu hanesan instrumentu universál ida atu eduka, liga, no kapasita foin-sa’e sira, enkuantu haburas legadu ida progresu sosiál nian ba jerasaun sira iha futuru,”.
Entre rezultadu xave sira seluk hosi konferénsia ne’e maka desizaun atu sai uma-na’in ba Bienál Kriadór Foin-sa’e sira CPLP nian tuirmai iha Cabo Verde iha tinan 2026.
Adisionalmente, aprova ona modelu finansiamentu foun ida ba atividade sira Juventude no Desportu nian, ne’ebé kanaliza kontribuisaun sira Estadu-membru nian ba Fundu Espesiál CPLP nian. Manuel Lapão, Diretór Koperasaun CPLP nian, nota katak medida ne’e sei hasa’e efisiénsia jestaun finanseira no garante sustentabilidade ba inisiativa juvenil no desportiva sira.
Timor-Leste nia envolvimentu ativu iha konferénsia ne’e subliña nia dedikasaun hodi aproveita juventude no desportu nu’udar katalizadór ba dezenvolvimentu sosiál no kulturál. Hodi sai uma-na’in ba Jogu Desportu XII CPLP nian, nasaun ne’e solidifika nia papél nu’udar parseiru komprometidu hodi haburas solidariedade entre nasaun sira ne’ebé ko’alia lian portugés no harii futuru ida ne’ebé inkluzivu ba juventude CPLP nian.
TATOLI
