DILI,19 novembru 2024 (TATOLI)—Deputadu FRETILIN, Antoninho Bianco, husu Ajénsia Nasionál ba Avaliasaun no Akreditasaun Akadémika (ANAAA) atu halo kontrola di’ak liután hodi regula kursu ne’ebé universidade sira loké.
“ANAAA universidade iha ita-nia rai-laran, sira-ne’ebé hetan akreditasaun ho ensinu superior. Ezemplu, estandár ho internasionál no rejionál ne’e oinsá liga ba jestaun matéria uza hanorin no fasilidade sira seluk. Hakarak hatene saida mak importante loos hodi halo universidade privadu ka públiku dehan kada grau sai ne’e no sira ne’ebé la prienxe rekezitu presiza haree didi’ak,” Nia hato’o iha debate proposta OJE 2025 faze espesailidade iha sala plenária Parlamentu Nasionál (PN), tersa ne’e.
Tanba ne’e, nia dehan, presiza kontrolu liután ba universidade iha rai-laran ba kursu sira-ne’ebé eziste hodi garante kualidade ensinu.
Deputadu FRETILIN, Dario Madeira, husu atu halo kontrolu kursu sira-ne’ebé loke iha universidade sira, liuliu haree oinsá prienxe kriteira.
“Hato’o ba ANAAA atu haree Timor-Leste iha univesridade barak, bainhira prienxe lai kriteira balun, hanesan iha fakuldade medisina iha UNTL, sá kriteira mak ANAAA haree fakuldade eziste iha univesidade, tanba universidade iha laboratóriu ka lae. Se universitairu ida halo estájiu iha HNGV dalaruma mosu prátika ladi’ak,’’ nia hateten.
Nia dehan, iha dosente hanorin alunu ka lae tanba universidade balun dosente laiha, ne’e faktu iha sábadu no loron feriadu dosente sira ativu loos iha universidade, loron baibain dalaruma laiha. Hanoin, presiza haree atu garante estudante sira apreende di’ak, nue’e hanesan fakuldade medisina loke iha universidade ezije iha laboratóriu.
Ministru Ensinu Superiór no Siensía no Kultura (MESSK), José Honorio da Costa Perreira, dehan dezde 2016-2024 ne’e ANAAA halo avaliasaun ba kursu 153 iha universidade sira eziste iha rai-laran no iha kursu 149 akreditadu no haat (4) haruka taka tanba la prienxe kritéria no avaliasaun ANAAA hala’o serbisu hamutuk ho Portugal, Autrália, Indonézia no Malásia.
ANAAA uza padraun 10 haree kursu sira hanesan infraestrurua, finansa, dosente no seluk tan.
Tan ne’e, ba avaliasaun ne’e ministeriru hala’o ho ANAAA, INCT, IPB no UNTL rasik.
Entertantu, PN aprova proposta OJE 2025 ho montante $801.924 ba ANAAA iha faze espesialidade ho votu afavór 41, kontra tolu (3) no abstensaun 19.
Orsamentu $801.924 ne’e, aloka ba saláriu vensimentu $242.965, bens no serbisu $208.959, kapitál dezenvolvimentu rihun $350.
Orsamentu ne’e finansia ba programa funsionamentu no dezenvolvimentu institusionál no ensinu superiór.
Jornalista : Nelson de Sousa
Editór : Cancio Ximenes
