DILI,19 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 ba Autoridade Inspesaun no Fiskalizasaun Atividade Ekonomika, Sanitária no Alimentar, Institutu Públika (AIFAESA, I.P) hamutuk $1.962.625 ho votu afavór 45, kontra tolu (3) no abstensaun 16.
“Nune’e orsamentu AIFAESA pasa,’’ Prezidente Parlamentu Nasionál, Maria Fernanda Lay, fó sai iha debate proposta OJE 2025 iha espesialidade, tersa ne’e.
Orsamentu ba AIFAESA, I.P ho totál hamutuk $1.962.625 ne’e, aloka ba saláriu vensimentu $946.963, bens no serbisu $765.662, kapitál dezenvolvimentu rihun $250, hodi finansia programa funsionamentu no dezenvolvimentu instituisionál no investimentu no diversifikasaun ekonomika.
Tau atensaun kontrola kualidade produtu
Deputadu FRETILIN, Antoninho Bianco, husu tau matan kontrolu produtu sira ho di’ak asegura kualidade hahán di’ak liuliu liu prazu iha nivel nasonál no munisipál tanba kestaun sira saúde.
Deputada FRETILIN, Maria Angelica Rangel, husu halo kontrolu ba produtu sira duplikasaun husi xineza balun, tanba tuir observasaun iha sasán balun iha Pateo orjinál husi Portugál maibé iha tua xineza duplika tuir ida-ne’e konsumu kualidade ka lae.
Nia husu atu halo kontrolu di’ak ba restorante sira iha Dili laran tanba balun la ijéne.
Deputada PLP, Maria Angelina Sarmento, propoin iha laboratóriu hodi halo teste hahán importadu tanba preokupasaun kona-ba kualidade produtu no kontrola produtu liu prazu.
“Kontrolu sasan prazu hanesan hakerek iha loloon, sasan dalaruma baratu, dalaruma to’o iha tasi laran bele troka, nune’e sira bele troka tanba ita laiha laboratóriu teste, nune’e presiza iha laboratóriu teste kualidade molok tama,’’ nia rekomenda.
Hatán ba kestaun ne’e, Ministru Koordenadór asuntu Ekonomiku, Francisco Kalbuady Lay, hateten kona-ba laboratóriu ne’e agora serbisu hamutuk ho Indonézia ba laboratóriu integradu iha kooperasaun di’ak, hodi kontrola produtu sira iha rai-laran, nune’e mós presiza bele teste produtu lokál atu hetan sertifikasaun iha Organizasaun Mundiál Komersiu (OMK) no ASEAN.
Nune’e, nia dehan, orsamentu iha laboratóriu iha AIFAESA, I.P tinan oin rihun $250 hodi serbisu hamutuk ho Indonézia, ho objetivu kontrola hahán iha kualidade di’ak duni.
Jornalista : Nelson de Sousa
Editór : Cancio Ximenes
