DILI,19 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 ba Arkivu Muzeu Rezisténsia Timorese (AMRT) Institutu Públiku (I.P) hamutuk $3.241.907 iha faze espesialidade ho votu afavór 42, kontra 0 no abstensaun 21.
“Ne’ebé, orsamentu AMRT pasa,’’ Prezidente Parlamentu Nasionál, Maria Fernanda Lay, fó sai iha debate proposta OJE 2025 iha faze espesialidade iha sala plenária PN, tersa ne’e.
Orsamentu ba AMRT, I.P hamutuk $3.241.907 ne’e, aloka ba saláriu vensimentu $1.299.518, bens no serbisu $1.915.389, hodi finansia programa kultura no patrimóniu no programa funsionamentu no dezenvolvimentu instituisionál.
Prezervasaun sítiu istóriku
Deputada CNRT, Cedelízia Farria dos Santos, husu AMRT koordena ho Sekretária Estadu Arte no Kultura (SEAK) no munisípiu sira haree fatin istóriku no abrigu, hodi halo prezervasaun no ba oin bele sai fatin turizmu kontribui mós reseita ba munisípiu sira.
Deputadu FRETILIN, Antonino Doutel, rekomenda harii mós muzeu iha nível rejionál no munisipál hodi rekolla istória iha parte frente armada no klandestina hodi hakerek istória loos ba jerasaun foun hodi hatene.
Nia husu atu koordena ho Ministériu Asuntu Kombatente Libertasaun Nasionál (MACLN) haree sítiu istoriku tanba dala barak monta sinál iha fatin istória, hanesan Mahunu iha Same, Vicente Reis iha Alas, harii tiha monumentu maibé laiha sustentabilidade, nune’e presiza hamoris sítiu sira hodi jerasaun foun sira hatene istória didi’ak.
Deputada FRETILIN, Maria Angelica Rangel, atu atensaun ba líder no komandate sira hodi halo peskiza istória ida loos no husu atensaun abrigu funu-na’in sira subar iha tempu rezisténsia durante tinan 24, tanba iha abrigu barak loos, hanesan abrigu Coni santana, Mauhudu, Taur Matan Ruak, Lu-olo no seluk tan, klaru presiza prezerva hodi hatene valor istória., tanba istória presiza konta loloos no tenke prezerva.
Deputada KHUTO, Olinda Guterres, husu atu atensaun prezervasaun ba abrigu ne’ebé uluk atuál Primeiru-Ministru (PM), Kay Rala Xanana Gusmão, subar bai ha Waioli, postu Venilale, munisípiu Baucau.
Deputadu PLP, Helder Freitas “Kamarudi’’, rekomenda peskiza istória ba lideransa másimu sira halo netik sira-nia istória liuliu iha tinan 1991 mai kraik, inklui jornalista estranjeiru sira-ne’ebé uluk hasoru ita-nia líder sira.
Deputadu CNRT, Natalino dos Santos, hanoin kona-ba abrigu sira, loos iha orsamentu munisípiu sira disikute mós asuntu ne’e hodi oinsá atu munisípiu sira identifika, nune’e halo abrigu sira sai sentru istória no sentru peskiza hodi nune’e estudante universitáriu ba halo peskiza.
Ministru Prezidénsia Konsellu Ministru, Agio Perreira, hateten komentáriu sira-ne’e parte AMRT simu hodi reforsa serbisu relevánsia AMRT nian atu prezerva istória, kona-ba iha sujestaun tenke iha estudu, hanoin muzeu hala’o hela no tinan oin kontinua halo peskiza.
Dezde Governu anteriór to’o mai ohin loron identifika ona abrigu 14 iha Ermera, Same, Baucau, Bobonaro inklui saudozu Nino Coni Sanatana ne’ebé halo tiha ona, ida-ne’e prioridade ida AMRT foka no AMRT fó duni prioridade ba líder ba serteza uitlidade no validade jerasaun foun sira hatene istoria, nune’e AMRT kontinua halo serbisu mantein relevansia ba istória luta.
Jornalista : Nelson de Sousa
Editór : Cancio Ximenes
