DILI, 19 novembru 2024 (TATOLI) – Prezidente Repúblika, José Ramos-Horta, apresia ba kolaborasaun di’ak entre Timor-Leste ho Universidade Katólika Atma Jaya Jakarta (UKAJJ) hodi fasilita timoroan sira ba hala’o estudu iha Universidade sira iha Indonézia.
“Prezidente Ramos-Horta hato’o nia apresiasaun ba programa kooperasaun entre Universidade Katólika Atma Jaya Jakarta ho Timor-Leste no enkoraja dezenvolvimentu inisiativa barak liután iha futuru, reforsa kompromisu atu hametin relasaun edukasionál entre nasaun rua ne’e,” tenik Reitór UKAJJ Yuda Turana ba jornalista sira hafoin hasoru malu ho Prezidente Repúblika Ramos-Horta iha Palásiu Prezuidensiál Dili, ohin.
Durante enkontru parte rua destaka parseria edukasionál ne’ebé metin entre Timor-Leste no Indonézia. Enkontru ne’ebé fasilita hosi Embaixadór Indonézia iha Timor-Leste tanba relasaun kleur entre nasaun rua ne’e iha setór edukasaun.
Nune’e, Reitór Turana agradese ba oportunidade bele hasoru malu ho Prezidente Ramos-Horta, no Xefe Estadu mós vizita ona instituisaun ne’e dala rua antes.
Ligasaun istóriku úniku ida, hodi temi katak fundadór Universidade Katólika Atma Jaya moris iha Flores, parte Illa Timor nian.
“Ami ko’alia barak kona-ba inisiativa kooperasaun edukasionál ne’ebé eziste, inklui programa bolsa estudu ne’ebé iha susesu, ne’ebé agora daudaun apoia estudante na’in 59 timoroan ho finansiamentu integrál. Kolaborasaun ne’e habelar la’os de’it programa sira troka estudante sira maibé inklui mós kooperasaun téknika iha área oioin hanesan Siénsia Laboratóriu, Teknolojia, no Bioteknolojia,” nia tenik.
Turana subliña, Papa Francisco nia mensajen kona-ba edukasaun nu’udar instrumentu maka’as ida ba eliminasaun pobreza.
Jornalista: Hortencio Sanchez
Editór: Florencio Miranda Ximenes
