VIQUEQUE, 19 novembru 2024 (TATOLI)- Autoridade, Veteranu no komunidade iha aldeia Lebadae no Loco-Loco, suku Matahoi, postu Uatulari, munisípiu Viqueque husu Governu Eletrisidade de Timor-Leste, Empreza Publiku (EDTL,E.P) atu dada eletrisidade.
Xefe Aldeia Loco Loco, Luis Miguel, informa iha Abril 2023, Eletrisidade de Timor Leste, Empreza Públika (EDTL,E.P) oferese projetu komunitaria ba komunidade Lebadae no Loco-Loco , maibé to’o agora projetu komunitária sai abandonadu.
“Momentu implementa projetu komunitária dada eletrisidade ba ami, Nune’e Prezidente EDTL,E.P kontinua husu ami povu Lebadae no Loco-Loco ajuda servisu volumtáriu, ne’ebé ami apoiu servisu kee estrada, tesi povu nian ai-horis hanesan kami, nuu no ai sira seluk. Depois ida-ne’e, ami esforsu hari’i tán ai-rin eletrsidade konsege hari’i tiha ai-rin eletrisidade hamutuk 50, maibé to’o agora sai abandonadu, nune’e povu kontinua tuur iha nakukun laran”, dehan Xefe Aldeia ne’e liuhusi komunidadu impresa,iha aldeia Lebadae, tersa ohin.
Nune’e, autoridade ne’e husu, Governu no EDTL,E.P hodi aseleira obra eletrifikasaun ne’ebé sai abandonadu iha Lebadae no Loco-Loco atu povu bele asesu ba naroma eletrisidade.
“Iha ne’e laiha impedementu ruma, karik iha impedementu ruma ami prontu apoia . Tanba ba kuaze tinan 24 ami moris iha nakukun laran, ami husu Governu tau matan ba ami”, nia sujere. .
Nia hatutan : “Ami hein tinan ida-ne’e maka EDTL, E.P la rezolve ami-nia ahi eletrisidade, ami sei keixa EDTL, ba iha tribunál tanba ami-nia povu nian ai-horis estraga hotu. Depois razaun EDTL,E.P paradu servisu mós ami lahatene. Ho kestaun sira-ne’e maka ami keixa sira, karik la rezolve”.
Iha fatin hanesan, Veteranu Lebadae, Domingos Pinto Ximenes, sente triste haree prosesu dezenvovlimentu liuliu ba ahi eletrisidade tanba povu Lebadae no Loco-Loco ne’ebé lokaliza iha área remota sei moris iha nakukun laran.
“Ami-nia maluk sira seluk agora asesu hotu ona ba ahi eletrsidade, ami povu iha área ida-ne’e sei depende ba kami, lilin no lamparina maka kalan tu’ur ba. Dala barak Governu mai haree ami, maibé sira la haree hetan ami-nia sofrementu. Ami veteranu hakarak husu Governu aseleira prosesu eletrisifikasaun, atu povu bele sesu ba ahi eletrisidade”, nia rekomenda.
Entretantu,abitante hela iha Lebadae no Loco-Loco ho totál uma-kain hamutuk 57 no totál populasaun hamutuk 1.020.
Jornalista : Vitorino Lopes da Costa
Editór : Florencio Miranda Ximenes
