DILI, 20 novembru 2024 (TATOLI)–Asosiasaun Movimentu Kablaki Timor-Leste (AMK-TL) rekomenda ba Governu atu buka mákina destruisaun lixu ospitalár ho kapasidade boot hodi bele halo destruisaun ka sunu lixu ospitalár nian.
Prezidente Asosiasaun Movimentu Kablaki Timor-Leste (AMK-TL), Vicente Sarmento, konsidera lixu ospitalár fó impaktu boot ba ema-nia saúde, tanba ne’e mak presiza iha ekipamentu ka mákina hodi sunu no destroi lixu sira-ne’e.
“Ita hakarak parseiru no Governu tau mákina ne’ebé iha kualidade di’ak ho kapasidade ne’ebé boot oinsa bele jere lixu ospitalár iha Timor-Leste. Tanba, mákina ne’ebé AMK-TL iha ne’e mákina ida ho kapasidade ne’ebé kiik, entaun presiza mákina ida-ne’ebé kapasidade bo’t,” Vicente Sarmento hateten ba jornalista sira, iha serimonia operasionalizasaun keima lixu ospitalár uza mákina inzenerator liuhusi simulasaun video, iha Vila Verde.
Prezidente ne’e hateten, lixu ospitalár iha Hospitál Nasionál Guidu Valadares (HNCV) no Sentru Saúde Vera Crúz barak, tanba rezultadu peskiza AMK-TL nian, hafoin propagasaun COVID-19 ne’e hatudu lixu ospitalárr ne’ebé sentru no ospitál tau iha arzein lixu iha kontentór 10.
Diretór Jerál Ambiente iha Ministériu Turizmu no Ambiente (MTA), Francisco Xavier Ximenes Soares, hateten lixu ospitalár ne’e nia impaktu perigozu tebes, presiza halo jestaun di’ak atu nune’e labele fó impaktu ba ambiente, animal no ba ema.
“Ita hotu hatene katak AMK-TL iha dadus husi survey katak sentru saúde balun sei rai hela lixu ospitalár iha kotentór no seidauk halo destruisaun ka sunu. Ida-ne’e perigozu tebes,” nia dehan.
Diretór ne’e hateten, diresaun kontinua halo sensibilizasaun ba ema hotu oinsá atu bele kuidadu ambiente no halo jestaun ba lixu hotu-hotu liuhosi programa eskola verde no suku verde no fó formasaun ba brigada ambientál iha munisipiu sira.
Nia dehan, asuntu lixu hanesan sai preokupasaun globál atu ema hotu tenke kuidadu hodi soe lixu ho loloos iha lixeira ne’ebé Governu prepara ona iha kada bairru iha Dili laran.
Diretór Nasionál Toxikolojia, Analiza Água no Ambiente, Mário da Costa Coelho, garante Laboratóriu Nasionál iha mákina ida iha kapasidade natoon no kondisaun di’ak, ne’ebé bele halo destruisaun ba lixu ospitalár no daudaun ne’e utiliza hela.
“Ita iha mákina destruisaun lixu laboratório nian ho kapasidade ne’ebé kiik. Ita mós serbisu hamutuk ho AMK-TL atu halo destruisaun ba lixu ospitalár sira-ne’e,” nia dehan.
Jornalista : Jesuína Xavier
Editór : Cancio Ximenes
