Komisáriu CAC husu Governu inisia projetu lei kona-ba rekoperasaun ativa
DILI, 20 novembru 2024 (TATOLI) – Komisáriu Komisaun Anti-Korrupsaun (CAC, sigla portugés), Rui Pereira dos Santos, husu ba Governu atu bele inisia projetu-lei rekoperasaun ativa atu bele fo biban ba CAC hodi sita pratrimóniu korruptór ida bainhira Tribunal deklara katak nia ne’e kondenadu duni ba hahalok korupasaun.
“Hanesan ha’u dehan katak ita-nia prevensaun ba kombate korrupasaun ne’e marka pasu pozitivu tanba ita iha ona lei MPCC. Agora buat ne’ebé ita presiza kompete mak lei kona-ba asset recovery ka lei kona-ba rekoperasaun ativa atu kuandu ita dada korruptór to’o Tribunál, ita bele sita nia aset sira ne’e. Maibé lei ne’e laiha difisil ba ita atu halo ida-ne’e. Tanba ne’e ita-nia vise-ministru iha ne’e atu halo, ida Governu nia kompeténsia atu haree ba ida-ne’e¨, Rui Pereira dos Santos, dehan ba jornalista sira hafoin atualiza servisu UNCAC ba funsionáriu CAC no instituisaun relavante sira ne’ebé hala’o kna’ar, iha salaun diplomátika Ministériu Negósiu Estranjeiru no Kooperasaun (MNEK) kuarta ne’e.
Nia rekorda, projetu lei ida-ne’e uluk Governu lori ona ba Parlamentu Nasionál atu diskute, maibé to’o ikus lei ne’e kaduka tiha.
”Ha’u seidauk Komisáriu ha’u uluk mús haree Governu lori ona esbosu lei ne’e ba Parlamentu atu diskute maibé lakonsege no kaduka tiha”, nia relembra.
Iha fatin hanesan, Vise Ministru Fortalesimentu Institusionál, Paulo Manuel dos Remédios, hateten Governu iha intensaun simu rekomendasaun ne’ebé CAC hato’o.
“Ha’u halo tiha ona enkontru regular sira ho Parlamentu hodi husu ba sira bainhira iha inisiativa mai husi Governu, Parlamentu tenke apoia”, nia afirma.
Nia dehan, kualker lei ne’e kompeténsia eskluziva husi Parlamentu. Governu bele halo proposta ba Parlamentu, maibé Parlamentu laiha intensaun ne’e mos tenke haree fila fali.
“Sira mak iha direitu ba inisiativa atu haree diretamente ba lei ida-ne’e, hahú tinan foun mai ita bele hetan solusaun”, nia konklui.
Jornalista: Natalino Costa
Editór : Zezito Silva
