DILI, 20 novembru 2024 (TATOLI)—Parlamentu Nasionál (PN), kuarta ne’e, liuhusi diskusaun espesialidade aprova proposta-lei Orsamentu Jerál Estadu (OJE) 2025 kona-ba taxa impostu seletivu konsumu aplikável.
“Rezultadu votasaun, afavór 42, kontra 22 no abstensaun 0, ne’ebé artigu 3 pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 iha faze espesialidade iha sala plenária PN.
Iha proposta-lei OJE 2025 iha artigu 3 Impostu, taxa no kontribuisaun iha númeru 4 hateten, iha 2025, taxa impostu seletivu konsumu aplikável;
Iha aleina a), hateten Ás aguas, incluindo as água minerais e as águas gaseificadas, adicionadas de açúcar ou de outros edulcorantes ou aromatizadas e outras bebidas não alcoólicas, exceto sumos (sucos) de fruta ou de produtos hortícolas, da pozisaun 20.09, posição pautal 2202, é de $3 por litro;
- b) Á cerveja de malte com teor de álcool inferior a 4,5%, posição pautal 2203.00.10, é $2,70 por litro;
- c) Á cerveja de malte com outros teores de álcool, posição pautal 2203.00.20, é de $4,50 por litro;
d)Ao vinho, vermute e outras bebidas fermentadas, posições pautais 2204,2205 no 2206, é de $4,50 por litro;
- e) Ao tabaco, posições pautais 2401,2402 e 2403, é de $50 por quilograma;
- f) Aos automóveis ligeiros de passageiros, posição pautal 8703, é de 10% do valor que exceda $10.000,00, 20% do valor que exceda $25.000,00 e 30% do valor que exceda $50.000,00;
- g) A pistolas de êmbolo cativo para bater animais, posição pautal 9303.90.00, é de 10% do valor.
Deputadu CNRT, Angela Maria Gorrubelo, hateten bee ne’e importante tebes, entende Governu tau impostu importasaun ba bee husi rai-li’ur $3 kada litru, ida-ne’e hodi promove produsaun bee iha rai-laran.
Maibé, nia dehan, dekretu-lei númeru 37/2020 kona-ba alinasaun saku no plástiku iha preokupasaun husi produtór lokál sira Timor-Leste la konsege redús presu iha rai-laran, tanba pakote husi bee fatin ne’e karun nafatin, tanba ne’e hasa’e taxa ba bee oinsá ho konsumu lokál.
Nia husu atu hasa’e mós taxa ba tabaku tanba ne’e saúde vida ema-nian no husu Governu halo regulasaun, faan tabaku labele lolon maibé atu faan pakote.
Deputadu FRETILIN, Maria Angelica Rangel, husu atu implementa lei ne’e liuliu kona-ba taxa ba bee importasaun.
Deputada PLP, Maria Angelina Sarmento, dehan foos importadu iha merkadu ne’ebé uluk ninia taxa impostu seletivu konsumu hatun ba 2.5% maibé iha merkadu foos kilograma 20 ho presu $18 no kilograma 25 ho $20 to’o $22.
Iha proposta-lei agora la prevee ona no karik ou mantein prevee nafatin $2.5%, maibé to’o iha ne’ebé normaliza presu foos garante populasaun sira-ne’ebé laiha kbiit atu sosa foos.
Nia husu kontrola bebida asukarada sira-ne’ebé prodús iha rai-laran liuliu husi xineza sira iha sira-nia armajen rasik.
Deputada CNRT, Maria Gorumali Barreto, dehan sigarru ilegál barak tama husi fronteira ne’e prezudika ba reseita ba nasaun, nune’e rekomenda tau prioridade no rigór implementasaun dekretu-lei númeru 14/2016 ba Rejime Kontrolu Tabaku.
Ministra Finansa (MF), Santina Cardoso, hateten kona-ba taxa importasaun ba bee intensaun proteje produtu rai-laran hanoin loos duni, nune’e sei implementa lei ne’e.
Nia dehan, Timor-Leste adere ona Organizasaun Mundiál Komérsiu (OMK) no ba ASEAN entaun Timor-Leste mós tenke haree ikus mai TL sei lakon reseita sira mai husi import duty, entaun haree hela atu altera lei ba impostu nian inklui IVA nian atu konverte fali ba iha ne’eba.
Ba foos nian, nia dehan, hanoin Timor-Leste presiza mak kontrolu merkadu nian, Governu presiza toma konsidera reforsa, liuliu atu garante katak produtu ne’ebé haree liuliu produtu nesesidade báziku tenta fó inzensaun liuliu Governu bele halo intervensaun merkadu ba komunidade ne’ebé nesesita liu.
Nia hateten, kona-ba tabaku hanoin loos duni protesaun ba saúde públiku no dalaruma Timor-Leste hasa’e taxa aas liu ema prefere tama husi dalan ilegál duké nia selu taxa liuhusi dalan apropriadu liuhusi dalan legál, nune’e haree ho kuidadu atu haree bainhira mak bele hasa’e fila-fali ou hatun maibé iha parte fronteira presiza reforsa di’ak liután.
Ministru Komérsiu Indústria (MKI), Nino Perreira, dehan halo ona diskusaun ho kompaña produtór bee no sira sente todan bainhira $3 kada litru, ba polítika zero plástiku ne’ebé implementa ida-ne’e implika mós sira-nia kapasidade atu mantein produsaun.
Nune’e, TL kontinua importa bee husi rai-li’ur tanba demanda merkadu tinan-tinan importa millaun $3-resin no haree husi importadór bee tolu ka haat iha rai-laran produsaun bee sira konsege atinje ona litru millaun 80 ne’ebé agora sirkula hela iha merkadu.
“Ita haree fila-fali demanda merkadu ba bee ne’ebé ita importa ne’e litru millaun 45, tanba ne’e ita iha ona kapasidade natkon ona atende konsumu rai-laran, Agora ita presiza haree polítika ida aplika kuota, tanba ita iha ona dekretu-lei medida defeza komersiál atu haree proteje ita-nia indústria rai-laran,” nia dehan.
Jornalista : Nelson de Sousa
Editór : Cancio Ximenes
