DILI, 20 novembru 2024 (TAOLI)—Xefe bankada PD iha Parlamentu Nasionál (PN), Manuel Noronha, husu Governu konstitusionál da-sia atu ezekuta Orsamentu Jerál Estadu (OJE) 2025 ho montante biliaun $2,6 ho di’ak ba povu nia moris di’ak.
Notísia Relevante: PN aprova proposta OJE 2025 biliaun $2,6 iha finál globál ho votu afavór 42
Lori bankada hato’o mensajen politika ba povu Timor-Leste ho firmeza katak, bankada fó votu afavór ba proposta-lei OJE 2025, tanba bankada iha kompromisu ba povu nia moris di’ak no lori mandatu governasaun ne’e to’o mandatu ramata iha tinan lima.
Tanba ne’e. husu Governu hala’o serbisu determindu atu implementa orsamentu ba iha tinan oin, ho ida-ne’e bankada hato’o rekomendasaun ba Governu revee hikas lei organika Governu da-sia hodi fahe kna’ar ba Vise Ministru no Sekretáriu Estadu hodi sukat kapasidade atu hala’o kna’ar tuir ida-idak nia kompeténsia.
“Rekomenda mós atu membru Governu sira tau matan didi’ak atu implementa programa sira ne’ebé sei fó moris di’ak ba povu no mós ajuda rezolve povu nia problema,” Nia hato’o deklarasaun votu iha aprovasaun finál globál ba prospota-lei OJE 2025 iha PN, kuarta ne’e.
Bankada hakarak kongratula mós deputadu sira hotu hala’o kna’ar hodi aprova OJE 2025, no ba oin atu kontinua hala’o kna’ar fiskalizasaun garante implementasaun orsamentu no programa ho kualidade.
“Nu’udar bankada Governu dudu membru Governu serbí povu. No fó apresiasaun aas Governu da-sia halo nia serbisu ho dedikasaun povu no nasaun,” nia dehan.
Deputadu bankada KHUNTO, António Verdiál Ferreira, hato’okatak KHUNTO fó votu afavór ba orsamentu ne’e tanba interrese nasaun no povu, presiza duni orsamentu atu hala’o dezenvolvimentu.
Vise Bankada FRETILIN, Deputada Maria Angelica Rangel, hateten bankada vota kontra proposta orsamentu jerál Estadu 2025 tanba orsamentu ne’ebé Governu aprezenta anti povu.
Vota kontra tanba orsamentu selu barak viajen membru Governu no funsionáriu ba rai-li’ur, iha saúde la hatudu medida foun ruma atu responde preokupasaun ne’ebé área saúde hasoru, orsamentu edukasaun menus ne’ebé laiha intensaun hasai kualidade edukasaun ba povu, no orsamentu ne’e laiha medida ruma ba kriasaun kampu serbisu ba joven sira, bolsu estudu ba povu kbiit laek nia oan.
Xefe bankada CNRT, Duarte Nunes, hato’o katak bankada fó nia votu afavór tanba orsamentu mak raan povu nian, nune’e importante hadi’a povu nia moris.
Nia fó apresiasaun ba prezidente PN ne’ebé bele lidera debate ne’e to’o nia rohan no to’o nia tempu antes PN aprovasaun orsamentu.
Apresia mós Governu da-sia ne’ebé bele lori ona rosamentu mai ho lideransa Primeiru-Ministru (PM), Kay Rala Xanana Gusmão, hatudu nia kapasidade oinsá bele ho maturidade simu krítika no fó informasuan resposta ne’ebé presiza no husu, ida-ne’e hatudu Governu ne’e iha kapasidade atu lidera nia governasaun ba oin.
“Apresia mós deputadu sira-nia partisipasaun importante no agradese kontribuisaun bele ona lori ita hamutuk aprova orsamentu ne’ebé ita hotu presiza hadi’a povu nia moris,” nia hateten.
Bankada fiar kompromisu Governu hala’o iha 2025 hanesan tinan realizasaun ho ami-nia akompañamentu hadi’a povu nia moris.
Xefe Bankada PLP, Maria Angelina Sarmento, dehan Governu iha tendénsia hodi halo levantamentu ba fundu mina-rai liu Rendimentu Sustentavel Estimadu (RSE) no Governu husu osan biliaun $2,617, maibé Governu laiha komitmentu atu asegura sustentabilidade fiskál hodi nune’e labele sakrifika futuru Timor-Leste nian.
Jornalista : Nelson de Sousa
Editór : Cancio Ximenes
