VIQUEQUE, 20 novembru 2024 (TATOLI)- Diretór Sekretáriu Tékniku Administrasaun Eleitorál (STAE), Humberto Fernandes, informa, daudaun prodús ona kartaun eleitorál biométriku hamutuk 527.
“Progresu resensiamentu kartaun eleitorál husi semi biométriku ba biométriku, hafoin lansamentu husi 8 Novembru to’o ohin, ami prodús ona eleitorál biométriku hamutuk 527 ne’e kompostu funasionáriu no komunidade sira”, Humberto Fernandes ba TATOLI,I.P iha ninia kna’ar fatin, Viqueque Vila, kuarta ne’e.
Daudaun ne’e nia dehan, STAE Viqueque mós simu pedidu husi institusaun sira hanesan Servisu Edukasaun, Servisu Saúde, Polísia Nasionál Timor Leste (PNTL), Servisu Agrikultura, Teras Propriedade atu atendimentu ba funsionáriu sira kartaun biométriku.
“Husi pedidu sira-ne’e ami hahú aban (kinta) ne’e fó atendimentu ba ita-nia funsionáriu sira-ne’ebé hato’o ona sira-nia karta pedidu ba ami. Ami mós sei la taka dalan ba ita-nia komunidade sira-ne’ebé hakarak mai halo sira-nia kartaun ba sistema biométriku”, nia hato’o.
Ekipa ofisiál atendimentu ba prosesamentu kartaun eleitorál ba sistema biométriku ofisiál na’in-haat maka fó atendimentu ba eletór sira.
Tuir dadús eleitór munisípiu Viqueque totál hamutuk 60.613, eleitór ne’ebé hela Viqueque atualiza ona iha Viqueque na’in-527 no Viqueque oan atualiza iha Dili na’in-209.
Jornalista : Vitorino Lopes da Costa
Editór : Florencio Miranda Ximenes
