VIQUEQUE, 22 novembru 2024 (TATOLI)- Prezidente Autoridade Munisípiu (PAM) Viqueque, Francisco Cruz Simões De Gonzaga Soares, informa, aloka ona orsamentu hamutuk rihun $17 hodi komemora loron proklamasaun independénsia ba dala-49 iha munisípiu Viqueque.
Tema nasionál ba komerasaun 28 novembru ba tinan 2024 mak: “𝐎𝐫𝐠𝐮𝐥𝐥𝐮 𝐛𝐚 𝐈𝐭𝐚-𝐍𝐢𝐚 𝐈𝐝𝐞𝐧𝐭𝐢𝐝𝐚𝐝𝐞 𝐧𝐨 𝐊𝐮𝐥𝐭𝐮𝐫𝐚, 𝐈𝐭𝐚 𝐇𝐚𝐫𝐢𝐢 𝐅𝐮𝐭𝐮𝐫𝐮 𝐋𝐢𝐛𝐞𝐫𝐝𝐚𝐝𝐞, 𝐉𝐮𝐬𝐭𝐢𝐬𝐚 𝐧𝐨 𝐄𝐬𝐩𝐞𝐫𝐚𝐧𝐬𝐚 𝐛𝐚 𝐈𝐭𝐚-𝐍𝐢𝐚 𝐏𝐨𝐯𝐮”.“
“Komemorasaun loron istóriku 28 Novembru, ami prevee uluk rihun $12, maibé ami tetu orsamentu ba finansia atividade sira-ne’e la to’o. Nune’e ami deside hasa’e orsamentu hamutuk rihun $17 hodi finansia ba atividade sira-ne’ebé komisaun trasa ona. Maibé, husi orsamentu ne’e sei aloka mós ba postu lima hodi komemora loron istóriku ne’e iha kada postu”, Francisco Cruz Simões De Gonzaga Soares, hateten ba TATOLI, iha ninia kna’ar fatin, sesta ohin.
Alokasaun orsamentu ba komemorasaun 28 Novembru ba kada postu sira hanesan Lacluta, Viqueque Vila, Ossu, Uatulari no Uatucarbau sei aloka ho montante $1.000 ba kada postu ida no komemora iha munisípiu aloka rihun $12,000.
Atividade sira-ne’ebé realiza iha munisípiu Viqueque maka hanesan inagurasaun sítiu turistíku rezisténsia 1983, expozisaun produtu lokál, aprezenta materiál militár funu, misa, isár bandeira no atividade adisionál seluk.
“Iha expozisaun militár ne’e, aprezenta arma sira-ne’ebé uluk utiliza iha tempu funu no árma modernu ne’ebé maka daudaun ne’e ita-nia F-FDTL sira uza, hodi aprezenta ba jerasaun foun sira bele koñese arma sira. Alende ne’e, ita mós fó espasu ba komunidade sira hodi aprezenta sira-nia produtu lokál, atividade sira-ne’e sei hahú abertura iha loron 24 Novembru, durante loron lima”, nia relata.
Tanba ne’e, autoridade munisipál ne’e husu ba komunidade no jerasaun foun sira hodi partisipa másimu no kria ambiente ida pás no estabilidade iha ambitu komemorasaun.
Serimónia komemorasaun ne’ebé realiza iha munisípiu Viqueque sei partisipa husi komunidade, FALINTIL-Forsa Defeza Timor Leste (F-FDTL) na’in-300 no bainaka importante sira seluk.
Jornalista : Vitorino Lopes da Costa
Editór : Florencio Miranda Ximenes
