DILI, 21 novembru 2024 (TATOLI) – Komisáriu Komisaun Anti-Korrupsaun (CAC, sigla portugés), Rui Pereira dos Santos, hateten índise presepasaun ba korrupsaun Timor-Leste mantein iha númeru 70 husi nasaun 180.
“Ita-nia ranking ba presepsaun korrupsaun Timor-Leste nafatin matein iha númeru 70 husi nasaun 180”, Rui Pereira hateten ba jornalista sira iha nia kna’ar fatin, kinta ne’e.
Pereira dehan, índise korrupsaun Timor-Leste ladiak no la aat liu maibé iha pasu ne’ebé di’ak tanba prevensaun no kombate korrupsaun, institusaun CAC halo nia papél.
Nia hatutan, Timor-Leste hanesan Estadu parte iha United Nations Convention against Corruption (UNCAC) presiza iha duni institusaun CAC atu afirma Timor-Leste nia kompromisu ba prevensaun no kombate korrupsaun.
Komisáriu realsa, ranking ba presepsaun korrupsaun Timor-Leste nafatin mantein iha núneru 70 tanba tinan ida ho balun CAC ladún halo servisu ho di’ak, tanba Komisáriu CAC simu pose iha Jullu, esforsu lubuk ida mak CAC halo ona.
“Koalia kona-ba prevensaun no kombate korrupsaun Timor-Leste, faze ida hatudu progresu ne’ebé di’ak tanba ita iha lejislasaun durante ne’e ajuda ita ba prevensaun no kombate korrupsaun mak lei MPCC lei númeru 7/2020, ida-ne’e ajuda tebes ita ba prevensaun no kombate korrupsaun”, nia konklui.
Jornalista: Natalino Costa
Editór : Zezito Silva
