DILI, 21 novembru 2024 (TATOLI)—Komisaun C trata asuntu Finansa Públika iha Parlamentu Nasionál (PN), kinta ne’e, aprova redasaun finál ba proposta-lei númeru 12/VI(2a) Orsamentu Jerál Estadu (OJE) 2025 ho montante biliaun $2,6.
Notísia Relevante: PN aprova proposta OJE 2025 biliaun $2,6 iha finál globál ho votu afavór 42
Prezidente Komisaun C, Cedelízia Faria dos Santos, hateten komisaun hamutuk ho Ministériu Finansa (MF) ne’ebé marka prezensa husi vise ministra no parte komisaun partisipa husi Deputadu na’in-lima, maiória husi bankada Governu de’it no bankada opozisaun la marka prezensa maibé halo ona aprovasaun redasaun finál ba proposta-lei orsamentu
“Ami aprova ona redasaun finál ne’e. Iha redasaun finál ne’e ita-boot sira hatene proposta kuaze 73 mak Deputadu sira submete mai iha plenária, bainhira ita halo diskusaun iha espesialidade, maibé só úniku proposta ida de’it mak pasa no proposta ne’e só ita hasai osan millaun $1 husi dotasaun todo Governu ne’ebé mak tau iha g7+ totál inísiu nian millaun $3. Ita hasai millaun $1 tau fali rihun $750 ba F-FDTL no rihun $250 tau ba Ministériu Edukasaun (ME), maibé nia mantein iha dotasaun todo Governu, depois mak husi MF halo transferénsia ba ME,” Nia hateten ba jornalista sira iha hafoin ramata reuniaun komisaun iha sala konferénsia PN.
Nia dehan, maibé nia totál globál laiha diferensa nafatin, só iha mudansa kategória bens serbisu no transferénsia públika.
Tanba proposta ida de’it, no husi artigu sira-ne’e PN haree laiha mudansa, PN halo alterasaun tiha ba tabela tolu hanesan tabela III, V no VI.
Nune’e, komisaun aprova ona redasaun finál ho maiória absoluta ho deputadu sira-ne’ebé mak marka prezensa.
Ho aprovasaun redasaun finál ne’e sei haruka ba Prezidente Parlamentu Nasionál.
“Oras tan uitoan, ami sei haruka kedas ba Prezidente Parlamentu Nasionál (PPN), depois orsida ka aban Prezidente Parlamentu Nasionál bele haruka ona ba Prezidente Repúblika hodi halo promulgasaun,” nia hateten.
Entretantu, PN liuhusi reuniaun plenária estraordináriu, iha 20 novembru ne’e, aprova proposta-lei númeru 12/VI(2a) Orsamentu Jerál Estadu (OJE) 2025 ho montante biliaun $2,6 iha finál globál ho votu afavór 42, kontra 23 husi bankada FRETILIN ho PLP no abstensaun zero.
Jornalista : Nelson de Sousa
Editór : Cancio Ximenes
