VIQUEQUE, 21 novembru 2024 (TATOLI)- Sekretáriu Estadu Kooperativa (SEKoop), Arsénio Pereira da Silva enkoraja estrutura Federasaun Multi Kooperativa Wekeke (FEMULCOW) hodi halibur koopertiva sira hotu atu hasa’e produsaun agrikola no hadi’a ekonómia rai-laran.
“Ohin, kooperativa primária sira inisiativa halibur malu hodi hari’i Federasaun Multi Kooperativa Wekeke iha munisípiu Viqueque. Nune’e ha’u enkoraja ba oin federasaun ida-ne’e esforsu akumula kooperativa sira iha munisípiu Viqueque hodi ita hamutuk hasa’e produsaun no hadi’a ita-nia ekonómia”, Arsénio Pereira da Silva, hateten hafoin ramata pose ba estrutura federasaun, iha salaun Finlos, ohin.
Ho ezistensia federasaun ne’e, SEKoop dehan Governu koñese no oin bele faslita ho fasilidade atubele hala’o atividade ho di’ak liutan.
“Governu liuhusi SEKoop fó esperansa no sei kontinua akompaña. Nune’e mós ami-nia odamatan nakloke ba federasaun sira hodi hato’o sira-nia pedidu hodi hetan tulun”, nia afirma.
Iha fatin hanesan Prezidente Autoridade Munisípiu Viqueque, Francisco Cruz Simões De Gonzaga Soares, husu ba estrutura eleitu ba Federasaun Multi Kooperativa Wekeke tenke forte no badinas servisu hodi hadi’a ekonómia iha munisípiu Viqueque.
“Iha munisípiu Viqueque poténsia ba setór agrikultura. Nune’e ha’u hakarak ita hamutuk hodi hadi’a setór agrikultura atu hasa’e produsaun. Atu ita bele trava ona sasán importasaun sira”, nia agradese.
Nia hatutan: “Ezisténsia federasaun ne’e sai oportunidade ba ita hodi hakat ba oin. ha’u husu agradese ba SEKoop ne’ebé mai fó pose ba estrutura federasaun iha Viqueque”.
Kompromete produs produtu lokal
Entretantu, Prezidente Federasaun Multi Kooperativa Wekeke, Mariano Gomes, kompromete liuhusi federasaun ne’e sei esforsu atu atinje mehi ne’ebé maka federasaun iha katak halo identifikasaun ba produtu agrikultura ne’ebé eziste iha munisípiu Viqueque hodi halo produsaun.
“Ba oin, ami sei identifika produtu sira-ne’ebé kooperativa haat prodús no ami buka dalan produtu sira-ne’e bele asesu ba merkadu no ami mós sei nakloke ba kooperativa sira seluk. Ami mós iha programa seluk maka hakarak hasa’e produsaun agrikola iha munisípiu Viqueque”, nia komrpomete.
Kooperativa ne’ebé hamahan-an iha Federasaun Multi Kooperativa Wekeke ne’e kompostu husi Kooperativa Maresbi, Kooperativa Hamaifor, Kooperativa HFF no Kooperativa CCTM.
Jornalista : Vitorino Lopes da Costa
Editór : Florencio Miranda Ximenes
