VIQUEQUE, 21 novembru 2024 (TATOLI)- Sekretáriu Estadu Kooperativa (SEKoop), Arsénio Pereira da Silva, kinta ne’e, fó pose estrutura foun Kooperativa Kréditu Lanahas (KKL) iha postu Viqueque Vila, Munisípiu Viqueque.
“ Ha’u dezafia ba estrutura no membru kooperativa sira labele hotu iha dalan klaran, maibé tenke luta ba oin hodi lori kooperativa ida-ne’e. Governu iha dever fasilita no regulariza ba orgnizsaun sira-ne’ebé eziste hanesan kooperativa”, Arsénio Pereira da Silva, hafoin pose ba estrutra Kooperativa Lanahas, iha salaun Autoridade Protesaun Sivil (APC, sigla portugés), aldeia Siralari, Viqueque Vila, ohin.
Sekretáriu Estadu mós parabeniza ba Kooperativa Kréditu Lanahas tanba hahú inisiu la’o Grupu rai no impresta osan ho ema na’in-10 ho sira-nia kapitál oituan, maibé sira konsege la’o to’o agora sira bele deside hamutuk rejista sai kooperativa ida.
“Ha’u sente kooperativa ida-ne’e agora ho kapitál rihun $97, durnte tinan tolu nian laran. Ho kapitál ida-ne’e sai ona fonte rendimentu ba membru sira-ne’ebé envolve iha kooperativa laran hodi muda moris. Nune’e ha’u husu membru no estrurtura sira nafatin nakloke ba ema seluk hodi envolve iha kooperativa laran”, Arsénio hato’o.
Alende ne’e, nia dehan, Governu liuhusi SEKoop nafatin fó oportunidade ba kooperativa sira-ne’ebé rejista ona, nune’e presiza tulun karik ajuda fazeadamente ba kooperativa sira.
Tuir dadús husi SEKoop hatudu kooperativa munisípiu Viqueque hamutuk 20 mak rejista no iha nivél nasionál kooperativa ne’ebé eziste hamutuk 230, ho totál membru hamutuk rihun 37, ho sira nian kapitál miliaun $19.
Iha fatin hanesan, Prezidente KKL, Domingos dos Reis Baptista, hatuir, membru Kooperativa Kréditu Lanahas ne’ebé envolve husi postu lima ne’ebé eziste iha munisípiu Viqueque no ba oin kooperativa sei la taka dalan ba komunidade sira seluk.
“Durante ne’e, ami fó kréditu ba ami-nia membru sira hodi halo uma, negosiu no selu oan sira-nia eskola”, nia realsa.
Nia dehan, membru Kooperativa Lanahas na’in-44 ne’ebé hala’o mós atividade agrikultura hanesan haki’ak ikan, manu, fahi, karau no halo toos.
Jornalista : Vitorino Lopes da Costa
Editór : Florencio Miranda Ximenes
