COVALIMA, 22 Novembru 2024 (TATOLI) – Prezidente Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P), Ana Paula da Cruz, observa fatin atu rai ekipamentu pezadu iha suku Ogues, postu administrativu Maucatar, munisípiu Covalima.
Ana Paula da Cruz dehan observasaun bá fatin ne’e atu tau ekipamentu pezadu no kria sub-brigada iha Covalima, nune’e bainhira tempu udan bele halo intervensaun emerjénsia ba iha normalizasaun estrada no mota sira.
“IGEADI tau nia brigada iha munisípiu sira, Covalima tama iha brigada Maria Tapó, ne’ebé kobre iha Bobonaro, Covalima no Ermera. Ita haree volume serbisu maka’as bainhira akontese dezastre naturál hanesan inundasaun”, Ana Paula da Cruz dehan iha Sanfuk, ohin.
Tanba ne’e, estabelese sub-brigada ida iha Covalima atu responde lalais ba halo normalizasaun estrada no mota sira, tanba brigada Maria Tapó labele reponde lalais ba munisípiu ne’e, tanba iha tempu udan volume serbisu iha Bobonaro maka’as.
“Tan ne’e mak ha’u-nia polítika kria sub-brigada ida iha Covalima. Ohin, ha’u observa ona fatin hodi haree katak fatin ne’e disponivel atu rai mákina no ha’u mós ko’alia ona ho autoridade sira”, nia salienta.
Ana Paula akresenta katak kriasaun sub-brigada iha Covalima bele kobre mós munisípiu Ainaro tanba besik malu.
Molok ne’e, IGEADI iha hanoin atu estabelese sub-brigada iha Zumalai, maibé tanba haree ba fatin ladún seguru, entaun muda mai iha Covalima.
“Ha’u haree fatin iha Zumalai la disponivel entaun ha’u mai tau iha Covalima, nune’e iha tempu badak organiza hodi lori mákina pezada hodi rai iha Covalima”, nia salienta.
Jornalista: Celestina Teles
Editora: Maria Auxiliadora
