DILI, 25 novembru 2024 (TATOLI) – Komandu PNTL liuhosi Departamentu Investigasaun Kriminál (DIK) Nasionál identifika Padre ‘falsu’ na’in-lima, tanba halo postajen iha midia sosiál facebook katak sira mak vigariu jerál ba igreja foun ho naran Igreja Catolica Carismatica Independente Timor-Leste (ICCTL) no Igreja Catolica Independente.
Sidadaun hirak ne’ebé tau aan hanesan padre ka koordenadór, mak Helder Matias de Menezes Pinto (Padre no koodenadór) ba Igreja Catolica Carismatica Independente Timor-Leste (ICCTL), António de Fatima do Espirito Santo (padre), Afonso Manuel Mauresi (padre), Eulalio Marques (padre) Tito da Silva Monteiro (padre no atualmente nudar Dosente iha UNITAL).
Suspeitu hirak ne’e halo postajen iha facebook hodi anunsia ezisténsia Igreja Catolica Carismatica Independente Timor-Leste no akresenta katak igreja foun ne’e hmbrik tanba hetan apoiu husi Amo Carlos Filipe Ximenes Belo iha sábadu (23/11). Ho informasaun ida-ne’e, Amo Belo hatán tiha ona katak nia laiha koñesimentu ba kestaun ida-ne’e.
Haree ba hahalok ida-ne’e mak Departamentu Investigasaun Kriminál sorumutu ho ekipa konjunta servisu sekretu iha Segunda, (25/11) tuku 12:00, asegura ema nain-lima hodi lori sira mai DIK Komandu Jerál PNTL Caicoli hodi submete ba prosesu identifikasaun. Enkuantu PNTL asegura ema na’in-lima ne’e iha área ne’ebé diferente iha Kapitál Dili.
Komandante Jerál PNTL, Komisáriu Jerál Polísia Henrique da Costa, hateten públiku akompaña informasaun iha midia sosiál iha semana kotuk ne’ebé virál tebes ho grupu foun ida hanaran igreja Catolica no deklara katak sira mak sai ona hanesan vigáriu jerál foun ba grupu Igreja Catolica Carismatica Independente Timor-Leste.
Komisáriu haktuir, grupu ida-ne’e lamenta igreja katólika nia desizaun kona-ba Amu Don Carlos Filipe Ximenes Belo ne’ebé la mai Timor-Leste maibé hela de’it iha Portugal. Tanba ne’e mak igreja foun ne’e harii.
“Ita akompaña katak buat sira ne’ebé ita-nia grupu sira halo ne’e la utiliza de’it Amo Don Carlos nia naran hodi atinje de’it sira-nia interese no situasaun ida ne’e halo komunidade sira hetan reasaun makas tanba ne’e mak Komandu Jerál Polísia Nasionál Timor-Leste orienta Departamentu Investigasun hodi foti medida”, Komisáriu Jerál Polísia Henrique da Costa, hateten jornalista sira liuhusi Konferénsia Imprensa ne’ebé halao iha Kuartel Jerál PNTL Caicoli, segunda ne’e.
Nia dehan, Xefe Departamentu Investgasaun Kriminal Nasionál, dezde horikalan, halo kedan koordenasaun ho Ministériu Públiku oinsa bele inisia prosesu ida-ne’e no bolu ona ema hirak ne’ebé mak envolve ka lansa informasaun ida-ne’e mai Komandu PNTL hodi foti sira-nia informasaun.
“Ita halo identifikasaun depois ita sei aprezenta ba Ministériu Públiku. Identifikasaun ne’ebé polísia halo ne’e bazeia ba Kódigu Prosesu Penál Timor-Leste, iha artigu 53 ne’ebé fó kompeténsia ba PNTL ka fó dalan ba polísia atu halo ida-ne’e”, nia adianta.
Henrique hateten, hahalok sira hanesan akontese bele hamosu ameasa ba ema na’in lima ne’e nia aan no ba ema seluk.
”Entaun ita tenke halo medida prevensaun ba ida-ne’e, sé lae ema seluk bele sai fali vítima ba buat ne’ebé mak sira publika”, nia afirma.
Nia hateten, Komandu PNTL mós liuhusi Padre Kapelaun PNTL komunika ona ho Don Virgilio Cardial do Carmo da Silva kona-ba asuntu ne’e tanba medida ne’ebé polísia halo ne’e la depende ba keixa ka buat ruma ne’ebé husi igreja Catolica.
“Ita halo ida-ne’e hodi prevene. Karik ba futuru mak husi parte Igreja Catolica hato’o fila fali keixa kona-ba buat sleuk ruma ita sei kontinua”, nia adianta.
Superiór komandu PNTL, husu ba komunidade sira atu labele halo fila fali julgamentu ema nain lima ne’e nia família iha sosiedade ka komunidade nia leet.
“Dalaruma estraga fila fali família sira ne’e ou dalaruma sira-nia oan ka sira-nia família, ameasa ou soe piadas, ida-ne’e presiza husu ba ita hotu, husik polísia halo nia servisu”, nia haktuir.
Kordenadór Igreja Catolica Carismatico Independente Timor-Leste (ICCTL) no Igreja Catolica Independente, Helder Matias de Menezes Pinto, esklarese ezisténsia ICCTL no Igreja Catolica Independente tanba lamenta ho desizaun Igreja Catolica no Estadu ne’ebé la responde pedidu sidadaun na’in-lima ne’ebé hato’o ba Igreja Catolica no Estadu, hodi husu atu Igreja hamutuk ho Estadu lori fila Amo Carlos Filipe Ximenes Belo husi Portugal mai Timor-Leste.
“Maibé to’o ohin loron Igreja Catolica seidauk fó ami-nia resposta ne’e, entaun ami foti ami-nia inisiativu katak sees husi Igreja Catolica. Ami halo ida-ne’e para ami hato’o ami nain hira nia preokupasaun ida ba Governu no mós ba Igreja Catolica, se bele hodi fila Amu Bispo Belo nudar Amu rezisténsia iha Timor-Leste tanba nia mak merese duni atu kaer Cardial iha Timor-Leste. Maibé to’o ohin loron Igreja Catolica seidauk fó ami-nia resposta ne’e, entaun ami foti ami-nia inisiativu katak sees husi Igreja Catolica no harii fali Igreja foun ”, nia dehan.
Nia hateten, Igreja Catolica Carismatica Independente Timor-Leste hahú konsolida kleur ona, kuaze tinan sanulu ona, nia membru barak ona, Igreja ida-ne’e ninia orientasaun ne’e ba liu formasaun identidade kulturál Timor-Leste nian.
“Ami besik tinan sanulu konsolida ona forsa iha baze tanba ne’e ami hamutuk harii igreja ida ne’ebé mak hambrik ho nia identidade kulturál Timor-Leste. Laiha ema ida mak suporta maibé lao mesak ho ami- nia kbiit rasik”, nia afirma.
Nia dehan, igreja foun ida-ne’e sei legaliza ninia ezisténsi iha Timor-Leste.
“Ha’u husu ema hotu atu labele tauk tanba ita iha ne’e defende ita-nia identidade kulturál. sistema patrimonial, ita tenke liberta tanba durante tinan barak, ema sempre dehan katak kultura Timor-Leste lulik sira ne’e presiza muda ida no ida ne’ebá, ami lakohi ida-ne’e tanba ne’e maka ami halo ida-ne’e primeiru ita tenke muda sistema igreja Catolica nian hodi liberta ita-nia kultura, ita-nia lulik no mós ita-nia sistema sira no fiar sira seluk”, nia dehan.
Iha fatin hanesan, António De Fátima do Espírito Santo, ne’ebé hatais mós batina-mean, virál mós iha média sosial sira, esplika liután katak, batina mean ne’ebé uza, la’os atu kontra fali Igréja Catolica.
António salienta, família sira loke facebook no haree ami-nia foto ne’ebé tau batina mean no ha’u-nia ferik oan hirak ba hahalok ida-ne’e katak hamonu dignidade família.
“Ha’u mós bilan hela. Ha’u dehan, ne’e ha’u la-hatene ida. Ami reza iha fatin ida-ne’e, objetivu ne’e atu sai di’ak nian, bele kura moras, bele halo buat hotu. Maibé bá fali ida-ne’e, ami la-hatene”, nia konklui.
Jornalista :Natalino Costa
Editór : Zezito Silva
