DILI, 25 novembru 2024 (TATOLI)—Parlamentu Nasionál (PN) liuhusi reuniaun plenária aprova asentimentu dezlokasaun vizita Estadu Prezidente Repúblika (PR), José Ramos Horta, ba repúblika Bangladesh ho votu afavór 31, kontra 14 no abstensaun rua (2).
“Ho nune’e, asentimentu ne’e autorizadu,” Primeira Vise Prezidente PN, Maria Teresinha Viegas, fó sai iha sala plenária PN, segunda ne’e.
Tuir karta ne’ebé primeira vise sekretária meza PN, Deputada Bendita Monis, lee sai iha plenária kona-ba informasaun kona-ba auzénsia iha territóriu nasionál iha dezlokasaun ofisiál Prezidente Repúblika ba Bangladesh iha loron 14 to’o 20 dezembru 2024.
Tuir termu previstu iha númeru 1 iha artigu 80 no aleina “h”, númeru 3 artigu 95 iha konstituisaun repúblika ho meiu ne’e solisita ba PN konsentimentu préviu ba dezkolasaun ofisiál ba Repúblika Populár Bangladesh, ba resposta konvite Muhamad Yunus Konselleiru Xefe Governu Bangladesh nian.
Iha programa inklui partisipa hanesan konvidadu onra iha selebrasaun loron vitória 16 dezembru 2024, no partisipa eventu atividade akadémiku promove hamutuk ho estudante universitáriu Dedaca.
Nune’e, PR sei sai husi Dili iha 14 dezembru no vizita ofisiál hahú entre 15-18 dezembru 2024, no fila iha 19 dezembru no to’o fila-fali iha Timor-Leste ne’e iha 20 dezembru 2024.
Jornalista : Nelson de Sousa
Editór : Cancio Ximenes
