DILI, 26 novembru 2024 (TATOLI)–Prezidente Autoridade Munisipiu Ainaro, Manuela Georgina Carmo Bucar Corte Real, hateten iha komemorasaun proklamasaun unilaterál independénsia Timor-Leste nian ba da-49 (29 novembru 1975-28 nobembru 2024) iha Oé-Cusse ne’e, PAM Ainaro promove hodi realiza debate públiku.
Atividade debate públiku ne’ebé partisipa husi akdemista, sosiedade sivil, Polísia Nasionál Timor-Leste (PNTL), grupu arte marsiál ho tema “Pás no estabilidade iha prosesu konstrusaun Estadu RDTL iha munisipiu Ainaro” ne’e realiza oinsá atu halo konstrusaun ba Estadu.
“Iha diskusaun ida-ne’e, maizumenus atu fó hanoin ba malu, pontu devista husi parte hotu-hotu. Saida mak ita presiza hanoin hamutuk ida de’it iha prosesu konstrusaun PAM Ainaro nian. Ida mós atu haree kona-ba papel PNTL, KRAM, sosiedade sivil, akademista no papel PAM nian saida ba iha konstrusaun Estadu ne’e rasik,” Prezidente Autoridade Munisipiu Ainaro, Manuela Georgina Carmo Bucar Corte Real, hateten ba Agência Tatoli, ohin.
Aleinde ne’e, nia dehan, iha komemorasaun 28 Novembru ne’e prienxe ho atividade misa agradesimentu, kari ai-funan, isar bandeira, no mós reprezentante veterenu na’in-lima (5) husi postu administrativu simu kondekorasaun husi Xefe Estadu.
“Iha atividade ba preparasaun sira-ne’ebé Komisaun Organizadora prepara mak hahú iha loron 26 Novembru. Ami hein kooperasaun ho komisaun konsellu veteranu ne’ebé sei iha kondekorasaun ba veteranu na’in-lima iha Ainaro,” nia dehan.
Nia hateten, iha mós atividade konsertu animasaun ba iha parte lorokraik husi estudante sira ba atividade dansa kulturál, hodi promove dansa kultura husi suku sira iha postu administrativu sira iha Ainaro.
Nia relata, Governu aloka orsamentu hamutuk rihun $14 ba munisipiu Ainaro hodi komemora loron 28 Novembru ne’ebé sentraliza iha Oé-Cusse no selebra iha kada munisípiu to’o postu administrativu sira iha territóriu.
“Orsamentu ne’ebé aloka ba iha atividade sira-ne’e iha kada postu. Iha Ainaro, iha diferensa alokasaun orsamentu tuir númenru suku iha kada postu. Ezemplu, Maubisse iha suku sia (9) ne’e ita aloka osan rihun $3, agora ba Hatubeliku iha suku rua (2) no sira seluk ita tau osan rihun $2. Kada postu ita fó responsabilidade ba postu Administradór ho nia estrutura,” prezidente ne’e haktuir.
Totál orsamentu ne’e, nia dehan, Governu prevee osan rihun $14 no $8.000 ba postu administrativu sira no restante ne’e hodi tau orsamentu prémiu nian ba atividade dansa kulturaá hodi promove identidade kulturál.
“Entaun, ami prepara insentivu ba sira bele hamoris ita-nia dansa tradisionál ne’ebé agora modernu ne’e ema haluha tiha,” nia ehan.
Ba atividade komemorasaun loron 28 Novembru ne’e, PAM Ainaro kria komisaun oranizadora ida-ne’ebé mak lidera husi administradór postu ne’e mak hanesan prezidente komisaun organizadora.
“Ami hatene katak despaixu Primeiru-Ministru ka Governu nian katak selebrasaun sira-ne’e halo iha postu hotu-hotu, nune’e iha munisípiu Ainaro ne’e sei selebra iha postu haat.
Jornalista : Jesuína Xavier
Editór : Cancio Ximenes
