VIQUEQUE, 26 novembru 2024 (TATOLI)-Prezidente Konsellu Kombatente Libertasaun Nasionál CCLN, sigla portugés) Munisípiu Viqueque, Adriano Camara ‘Lentil’, husu kombatente sira husi munisípiu Viqueque hamutuk 816, ne’ebé simu medalla tenke kuidadu ho di’ak hodi hatutan ba jerasaun foun sira.
“Ohin loron estadu rekoñese kombatente sira-nia dedikasaun no kontribuisaun ba funu autodeterminasaun independénsia Timor-Leste. Tanba ne’e, estadu distribui medella ba kombatente sira, ba medalla ne’ebé kombatente sira simu ne’e nian valór importante teb-tebes ba ita-nia nasaun. Ha’u sente medella ne’e sai importante tanba aban-bairua ita laiha tiha, medalla ne’e nian valór sei hela ba jerasaun foun sira hodi haktuir nafatin ita-nia istória ukun rasik. Tan ne’e ha’u husu kombatente sira kuida didi’ak imi-nia medella ne’ebé estadu atribui ba imi kombatente sira”, Adriano Camara ‘Lentil’, hateten, iha serimónia distribuisaun medella ba kombante sira, iha resintu munisípiu Viqueque, ohin.
Prezindente CCLN Viqueque ne’e hatutan, medalla sai hanesan reprezenta kombatente sira-nia sofrimentu ne’ebé durante funu sira dedika sira-nia an ba libertasaun patria.
“Ho ida-ne’e estadu atribui medalla ne’e, la’ós osan tanba osan ne’e ita sei moris simu hodi gasta ba ita-nia nesesidade moris nain, maibé medalla ne’e ita sei tau hela ba oan no bei-oan sira hodi hatene ita-aman, inan no tiu sira nian kontribuisaun ba nasaun ida-ne’e”, veteranu ne’e fó hanoin.
Iha fatin hanesan, Prezidente Autoridade Munisípiu (PAM) Viqueque, Francisco Cruz Simões De Gonzaga Soares, haktuir, ba luta libertasaun ukun rasik an estadu no Governu rekoñese ona, maibé funu liberta povu seidauk, nune’e hamutuk nafatin hodi liberta povu husi mukit no kiak.
“Ha’u husu ba parte hotu-hotu mai ita hamutuk hodi liberta ita-nia povu, husi ki’ak no mukit ,
PAM mós hato’o parabéns ba kombatente sira ne’ebé simu medella kondekorasaun husi estadu no Governu
Medella ne’ebé atribui ba kombante sira husi munisípiu Viqueque kompostu husi medella funu na’in, medella gerilla no medalla ordém Nicolau Lobato.
Tuir dadús husi KKLN munisípiu Viqueque kombatente sira-ne’ebé simu medella husi postu lima hamutuk 816.
Jornalista : Vitorino Lopes da Costa
Editór : Florencio Miranda Ximenes
