DILI, 26 novembru 2024 (TATOLI)–Arsebispu Arkidioseze Metropolitana Dili, Dom Virgílio Kardeál do Carmo da Silva, konsidera difísil ba ema hotu atu halo rekonsiliasaun ba istória pasada maibé tenke nakloke aan hodi haree ba futuru.
Kardeál fó hanoin hikas povu Timor-Leste atu la’o tuir nia istória ne’ebé durante tinan naruk ne’e nian hodi koko no haree oinsá mai to’o ukun rasik aan ne’e, kanek pasadu nian ne’e husik ka iha dalan ida ba timoroan, nu’udar sarani ho vizita amu Papa Francisco ninian ne’e konvite ida mós ba timoroan atu haree ho matan kona-ba sarani ninian.
“Tanbasá, ita labele hanoin ba kotuk, ita tenke hanoin ba oin katak atu loke liután. Tenke loke dalan luan liutan ba ita. Defísil, maibé ita mós iha korajen no haree tuir mak ne’e, ba sarani sira ita Na’in Jesus Kristu hatudu mai ita dalan ne’ebé klaru atu ita la’o tuir. Maske susar maibé ida-ne’e krús ne’ebé sarani ninian, ita tenke aprende hosi ne’e,” Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten ba jornalista sira, iha sede episkopál, Lecidere, segunda (25 novembru 3034) ne’e.
Nailulik husi kongregasaun Salesiano ne’e hateten, igreja mak hanorin oinsá atu ema bele perdua malu no bele hako’ak ema hotu iha tempu difisil.
“Loos duni, kuandu ko’alia kona-ba rekonsiliasaun ne’e igreja labele sees tanba igreja rasik mak hanorin nia povu. Jesus rasik, iha krús leten, hanorin nia sarani sira atu ita perdua malu no hako’ak malu. Ko’alia kona-ba igreja nia pozisaun, igreja la’o tuir sé? Igreja la’o tuir ida-ne’ebé iha krús leten, ita Na’in Jesus Kristu. Nia hanorin ita atu aprende,” nia hateten.
Dom Virgílio Kardeál esplika, nu’udar ema lori kanek no buat todan barak maibé buat ne’e hotu ema hotu mós hanoin katak buat hotu nu’udar ema sarani tenke haree ba oin (loron aban ka futuru).
“Ita-nia istória iha maibé ita mós hanoin no haree ba oin Timor nia futuru, no nasaun ida foin daudaun mós ita ko’alia makaas kona-ba fraternidade umana. Ko’alia kona-ba ita hotu mesak maun-alin. Buat hirak ne’e hotu, atu enkoraja ita atu haree ba oin. Nu’udár timoroan no ema, kanek ema hotu iha maibé ita haree nu’udar ema sarani, ita mós iha fuan boot. Ida-ne’e atu hatene mós hako’ak ema dalabarak hakanek ita,” nia dehan.
Jornalista : Jesuína Xavier
Editór : Cancio Ximenes
