VIQUEQUE, 26 novembru 2024 (TATOLI)- Iha Komemorasaun loron proklamasaun independénsia ba dala-49, ne’ebé monu iha 28 Novembru, komunidade husi munisípiu Viqueque husu misa agradesimentu ba erói sira-ne’ebé luta ba libertasaun pátria.
Iha misa selebrasaun ne’e, Padre selebrante, Tomas de Aquino Guterres Lopes da Cruz, hateten, misa agradesimentu ida-ne’e hodi hanoin fila fali ba loron proklamasuan independénsia Timor Leste nian ne’ebé líder sira proklama indepedénsia iha tinan 49 liubá kotuk.
“Ohin, ita moris ona iha liberdade nian laran, nune’e ba ema hot-hotu nian moris iha ksolok no sente moris nian valór simu hanesan kriatura Maromak nian. Tanba mai husi istória ka funu naruk ne’ebé ema barak mak lakon vida hodi liberta patria”, Padre ne’e hatete iha ómilia, iha Igreja Imaculada Viqueque Vila, ohin.
Pe. Tomas hatutan: “Nune’e ohin ita hamriik haksolok hodi haree fila ba kotuk, akontesimentu sira-ne’ebé mosu iha ita-nia rain doben Timor Leste. Ohin sai hanesan momentu ida, atu ita reflete ba pasadu”.
“Iha faze ukun an ida-ne’e ita hanoin ona saida maka ita bele halo ba rai no povu ida-ne’e, hodi lori povu no rai ba moris ida dignu, moris ida liberdade, justisa no moris iha domin ba malu tuir na’in Maromak nia ukun fuan no hakarak”.
Amu dehan tan liberdade ba tinan 49 la’ós ona labarik, tenke sai maduru ona, nune’e presiza transforma atetude sira hodi haree buat hotu-hotu ho matan domin nian, la’ós matan ódiu no laran moras ba malu.
“Ba selebrasaun loron istóriku ba ita-nia rai ida-ne’e, sai hanesan momentu ida, ba ita hodi kontinua halo reflesaun ba ita sira-ne’ebé sei moris no goja ukun rasik an ida-ne’e. Ba maluk sira-ne’ebé uluk mehi ba ukun rasik an, maibé oras-ne’e sira la hamutuk ho ita hodi goja ukun an. Nune’e ita nafatin buka reafirma éroi sira nian mehi ba ukun rasik an. Tanba ne’e liuhusi misa ida-ne’e hodi ita reja ba ita-nia éroi sira nia klamar”.
Hafoin misa agradesimentu ne’e, Amu selebrante fó bensaun mós ai-funan no lilin, hodi autoridade no komunidade sira kontinu lori bá iha jardin eroi iha Kararas, suku Bibileo, postu Viqueque Villa.
Entretantu, iha selebrasaun misa agradesimetnu ba komemorasaun ne’e hetan partisipa husi autoridade lokál, veteranu, komunidade no estudante sira iha postu Viqueque Vila.
Jornalista : Vitorino Lopes da Costa
Editór : Florencio Miranda Ximenes
