DILI, 26 novembru 2024 (TATOLI)–Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten selebrasaun proklamasaun unilaterál independénsia Timor-Leste nian ba da-49 (29 novembru 1975-28 nobembru 2024) iha 28 Novembru sai hanesan reflesaun hodi kontribui ba dezenvolvimentu nasionál.
Komemorasaun loron 28 Novembru ba proklamasaun unilaterál Timor-Leste iha tinan ida-ne’e Governu liuhosi reuniaun Konsellu Ministru aprova tema “Orgullu ba Ita-nia Identidade no Kultura, Ita Harii Liberdade, Justisa no Esperansa ba Ita-Nia Povu”.
Kardeál fó hanoin hikas fali ezemplu eroi sira-ne’ebé mate ne’e kontribui barak ona, nune’e husu timoroan sira ohin loron kontinua kontribui ba dezenvolvimentu no partisipa ativu hodi kria dame no unidade atu bele dezenvolveTimor-Leste.
“Ne’e duni bainhira ko’alia kona-ba loron boot sira la’ós ko’alia kona-ba festa de’it. Maibé, liuliu kontinua kontribui ba ita-nia partisipasaun ba dezenvolvimentu rai ida-ne’e, harii liutan dame no unidade iha ita-nia rai doben Timor-Leste. Ida-ne’e sai papel no responsabilidade. Eventu ida-ne’e konvida ita ida-idak hodi kontinua responsabilidade atu hakaas aan atu bele kolabora di’ak liután sakrifika liután ita-nia aan serbisu hodi dezenvolve ita-nia rain,” Dom Virgílio Kardeál do Carmo da Silva, SDB, hateten ba jornalista sira iha Sede Episkopál, Lecidere, segunda ne’e.
Nia esplika loron 28 Novembru nu’udar loron istóriku ba timoroan hotu ninian no sempre ita selebra loron importante sira hanesan ne’e konvida timoroan hotu atu halo reflesaun di’ak ida.
“Reflesaun ida-ne’e atu valoriza importánsia iha istória timoroan nian. Reflesaun ba loron 28 novembru lori fila-fali mai ita timoroan ida-idak atu halo ezame konsiénsia ida hodi husu ba ita-nia aan saida mak ita ida-idak halo. Hahú husi joven to’o ita-nia polítiku no to’o lideransa sira, saida mak ita halo ho fuan ho laran, atu bele kontribui hodi tane aas nafatin dignidade rai ida-ne’e no povu ida-ne’e ninian iha momentu ida-ne’e,” nia reforsa.
Jornalista : Jesuína Xavier
Editór : Cancio Ximenes
