VIQUEQUE, 27 novembru 2024 (TATOLI)-Médiku husi instuisaun FALINTIL-Forsa Defeza Timor Leste (F-FDTL) fó atendementu saúde ba vateranu no komunidade sira iha postu Viqueque Vila, munisípiu Viqueque hodi selebra komemorasaun lorom 28 Novembru.
“Ami hahú halo tratamentu, iha loron domigu (24/11) no sei ramata kuarta ne’e, ne’ebé atendimentu ne’e ba ita-nia veteranu no komunidade barak maka hola parte iha konsulta sira-nia saúde. Kona-ba atendimentu saúde ne’ebé ami fó ba komunidade sira-ne’e espesializada, la’ós komunidade sira hela, iha vila mak hetan konsulta espesializa ida-ne’e. Tanba ne’e, ami husi instuisaun F-FDTL mai fó tratamentu fó perioridade ba veteranu no komunidade sira-ne’ebé hela iha área rurál atu asesu ba konsulta espesiál ida-ne’e hodi sira trata sira nian saúde”, katak médiku husi F-FDTL, Edmundo Soares Monteiro, ba jornalista sira, iha postu Viqueque Vila, ohin.
Atendimentu ida-ne’e la’ós médiku husi F-FDTL mesak, maibé F-FDTL envolve mós médiku espesialista sira husi HOREX Baucau, Klínika Veteranu Baucau no médiku Sentru Saúde Viqueque Vila ne’ebé sai ekipa konjuta ida hodi fó tratamentu veteranu no komunidade sira.
Atendimentun durante loron haat iha suku Bibileo, Caraubalu, Uma Uain Kraik no agora iha suku Uma Ki’ik.
Durante konsulta ba populasaun Viqueque maioria rejista kazu moras sira hanesan tensaun no problema matan, isin moras no moras sira seluk.
Nia fó hanoin ba veteranu no komunidade sira tau nafatin importansia ba saúde, bainhira moras ruma tenke halo tratamentu sedu, atu prevene moras, hodi labele sai grave liu hafoin halo tratamentu.
Tuir dadús durante atendimentu ba veteranu no komunidade Viqueque Vila na’in-392, atendementu ne’e médiku sira husi F-FDTL na’in 3, médiku espesialista HOREX Baucau na’in-6 no Klínika Veteranu Baucau na’in-7 no sentru Saúde Munisípiu Viqueque na’in-2 hamutuk na’in-18.
Iha fatin hanesan, Reprezentante Xefe suku Uma Karik, João da Costa, sente orgullu no kontente tanba ekipa médiku husi F-FDTL mai halo tratamentu ba veteranu no komunidade sira-nia saúde ho di’ak
“Ho atendementu ne’e, ha’u hakarak rekomenda ba ekipa médiku sira ba oin, kontinua fó tratamentu sira hanesan agora dadaun ne’e. Atu nune’e ita-nia komunidade sira fasil asesu hodi trata sira moras sira”. Nia hato’o.
Entertantu, Veteranu Viqueque, Miguel Soares “Raidok”, mós agradese ba F-FDTL no ekipa médiku sira ne’ebé fó atendimentu di’ak.
Jornalista : Vitorino Lopes da Costa
Editór : Floréncio Miranda Ximenes
