DILI, 27 novembru 2024 (TATOLI)–Portavós Forum Komunikasaun Feto Timor Lorosa’e (FOKUPERS), Lúcia Fátima da Silva, informa FOKUPERS rejista kazu violénsia doméstika (DV) 557 no kazu abuzu seksuál hasoru feto no labarik feto iha tinan lima ikus ne’e hamutuk 301.
“Organizasaun fornesedór servisu asisténsia ba feto no labarik-feto sira, inklui polisia VPU-loro-loron simu keixa no fó asisténsia ba feto no labarik-feto sira-ne’ebé sai vítima ba violénsia bazeia ba jéneru,” portavós ne’e hato’o liuhosi konferénsia imrprensa iha Faról.
Nia relata, durante tinan lima (5) nia laran ne’e feto na’in lima (5) mak mate tanba violénsia doméstika-violénsia husi laen no labarik-feto ida (1) mate tanba violénsia seksuál no violénsia fiziku iha uma laran.
Tuir nia, violénsia hasoru feto no labarik-feto kontinua aas ne’ebé kauza husi situasaun no problema sosiál ne’ebé boot no todan iha feto nia moris.
“Depoizde ukun aan, situasaun violénsia sei kontinua hafalun feto no labarik-feto nia moris. Iha feto 33% ho idade15-49 iha esperiénsia ona violénsia husi sira-nia parseiru moris. Ne’e signifika feto na’in-ida (1) entre na’in-tolu (3) hetan violénsia iha nia moris,” nia dehan.
Tuir nia, violénsia ne’e la’ós de’it akontese ba feto adultu maibé feto hasoru violénsia hahú kedas husi sei labarik.
“Iha dadus DHS hatudu mós katak feto 66% hetan ona esperiénsia abuzu fíziku no feto 24% hetan esperiénsia abuzu seksuál bainhira sei labarik,” nia hatete.
Portavóz ne’e relembra relatóriu CAVR “Chega!” ne’e rejista feto liu 800 hetan ona violasaun seksuál durante tempu okupasaun Indonézia nian hahú husi tinan 1975 to’o tinan 1999.
Maibé, nia dehan, violénsia hasoru ba feto kontinua buras maske okupasaun hotu ona maibé kanek sira-ne’e seidauk maran, nafatin kanek sira seluk mosu tanba feto mak nafatin sai vitima ba violénsia.
Nia husu ba ema hotu nakait kampaña loron 16 ativizmu kontra violénsia hasoru feto no labarik feto atu partisipa másima hodi hateten lae ba violensia hasoru feto no labarik feto sira.
“FOKUPERS bolu nafatin ita hotu-hotu nia atensaun, atu ita hotu hamutuk halo mudansa ba Timor-Leste ida-ne’ebé hakribit violénsia hasoru feto no labarik feto sira. Ita hotu nia responsabilidade hodi halo asaun kiik ne’ebé bele kontribui ba pás iha família, sosiedade no nasaun hodi hateten lae ba violénsia no hamutuk halo mudansa,” nia dehan.
Jornalista : Jesuína Xavier
Editór : Cancio Ximenes
