BAUCAU, 27 novembru 2024 (TATOLI) – Veteranu.kombatente libertasaun nasionál hamutuk na’in-788 simu medalla kondekorasaun iha Baucau.
Medalla kondekorasaun referida atribui ba veteranu sira bazea ba desizaun husi Prezidente Repúblika liuhusi dekretu Prezidenti Repúblika númeru 11/2024, loron 24 novembru.
Dekretu referida hateten kondekorasaun grau kolár, grau medalla, grau insina orden Timor-Leste no medalla méritu inklui sertifikadu rekoñesimentu ba individuál nasionál no internasionál ne’ebé dedika aan ba benefísiu ba Timor-Leste durante prosesu dezenvolvimentu nasionál.
Veteranu Custódio Belo ‘Alin Laek’, hateten, ohin estadu atribui medalla kondekorasaun ba veteranu kombatente no eroi sira nu’udar rekoñesimentu ba kontribuisaun luta libertasaun nasionál.
“Estadu iha obrigasaun morál atu fó rekoñesimentu no valorizasaun ba nia ema sira-ne’ebé uza durante funu,” Veteranu Alin Laek hateten iha Sentru Konvensaun Baucau (CCB, sigla portugés), kuarta ne’e.
Liuhusi rekoñesimentu referida fó hanoin ba hotu-hotu katak durante funu timoroan fahe malu maibé hafoin nasaun liberta aan hosi okupasaun tenke fó liman ba malu hodi kontribui ba dezenvolvimentu.
Alin Laek konsidera munisípiu Baucau iha tempu luta nu’udar baze hodi sustenta funu to’o Timor-Leste hetan ninia independénsia hodi harii Repúblika Demokrátika Timor-Leste (RDTL).
“Ha’u fó parabéns ba maluk sira iha Baucau,” Alin Laek akresenta.
Veteranu, Lourenço José Cabral ‘Aquito tanque de Gueira’, nu’udar Baucau oan senti kontente tanba reprezenta simu Saudoza Inan Julieta Fátima Cabral ‘Bui-Lesa’ nia medalla orden Nicolau Lobato.
“Veteranu sira tenke luta tan dala-ida atu povu moris di’ak, ida-ne’e mak ha’u rekomenda,” Akitu hato’o mensajen.
Husi veteranu hamutuk na’in-788 simu medalla kondekorasaun ho kategoria tolu kompostu husi medalla orden Nicolau Lobato kategória grau 3 hamutuk na’in-744, grau 1 kategoria gerrilleiru na’in-tolu no grau 2 husi kategoria funu na’in hamutuk na’in-44 ne’ebé maihusi postu administrativu neen.
Jornalista : Natalino Belo
Editór : Evaristo Soares Martins
