DILI, 26 novembru 2024 (TATOLI) – Sekretaria Estadu Formasaun Profisionál no Empregu (SEFOPE) asina memorandu entendimentu ho entidade Nasaun Unidas (UN WOMEN) ba igualdade jéneru no fó kbiit ba feto sira iha Timor-Leste.
“Ohin ita marka signifikativu ida iha ita-nia viajen koletiva ba igualdade jéneru no empoderamentu feto nian, entaun ho asinatura Memorandu Entendimentu (MOU) ida-ne’e ho Entidade Nasoens Unidas ba Igualdade Jéneru no Hakbiit Feto (UN Women) hanesan testamentu ida ba ita-nia kompromisu hamutuk atu kria Timor-Leste ida-ne’ebé ekuitativu no inkluzivu liu”, Rogério Araujo Mendonça, hateten iha salaun SEFOPE Caicoli, ohin.
Mendonça afirma, liuhusi parseiru ida-ne’e, Governu hakarak hakbiit feto ekonomikamente sira mak fó asesu ba feto sira ba formasaun profisionál barak liután, oportunidade empreendedorizmu, sei fó kbiit ba sira atu kontribui ba nasaun nia kresimentu ekonómiku. Nune’e’e mós, promove igualdade jéneru mak ita sei servisu hamutuk atu dezafia estereótipu jéneru no diskriminasaun, hodi garante katak feto no labarik-feto sira iha oportunidade hanesan iha aspetu hotu moris nian. Tuir mai hametin partisipasaun iha forsa traballu, hodi investe iha feto sira-nia abilidade no kapasidade no sei hasa’e sira-nia partisipasaun iha forsa-traballu no kontribui ba ekonomia ida ne’ebé produtivu no rejiliente liután.
“MoU ida-ne’e trasa enkuadramentu ida ne’ebé komprensivu ba kolaborasaun, ne’ebé foka ba área ekonomia kuidadu nian hanesan, ami serbisu atu rekoñese no valoriza serbisu kuidadu nian, setór ida ne’ebé domina hosi feto sira, no promove polítika sira ne’ebé apoia kuidadu-na’in sira. Formasaun Profisionál ami sei habelar asesu ba programa formasaun profisionál ho kualidade ba feto sira, hodi ekipa sira ho abilidade sira ne’ebé presiza atu hetan susesu iha forsa traballu.
Nia esplika, Servisu Sazonál no Mobilidade Traballu Governu sei asegura katak feto sira iha oportunidade hanesan atu partisipa iha programa empregu iha rai-liur, enkuantu salvaguarda sira-nia direitu no moris-di’ak. Advokasia Polítika Governu sei halo advokasia ba polítika sira ne’ebé promove igualdade jéneru no empoderamentu ekonómiku feto nian, tantu iha nivel nasionál no internasionál.
“Hodi servisu hamutuk, ita bele kria futuru ne’ebé nabilan liu ba feto no labarik feto timoroan hotu. Parseria ida-ne’e mak instrumentu ida ne’ebé maka’as atu lori mudansa pozitivu no harii sosiedade ida ne’ebé justu no ekuitativu liu. Ha’u hakarak hato’o ha’u-nia agradesimentu sinseru ba UN Women ba sira-nia kompromisu ne’ebé la nakdoko ba igualdade jéneru no empoderamentu feto. Hamutuk, ita sei halo impaktu ida ne’ebé dura ba feto no labarik-feto timoroan sira nia moris”, nia dehan.
Iha fatin hanesan, Xefe Gabinete UN Women Timor Leste, Amy Nishtha Satyam, hateten objetivu husi asina MoU ne’e atu haree ba área empregu formasaun profisionál, tantu ekipa foinsa’e sira, inklui feto foinsa’e sira ho abilidade koñesimentu no atributu sira ne’ebé presiza ba empregu imediatu no fó impaktu pozitivu ba sira-nia moris di’ak.
“Ita hatene katak dalan barak atu dezenvolve ekonomia maka investe iha feto sira, moris-di’ak, no empoderamentu ekonómiku, liu husi abilidade koñesimentu no atributu sira ne’ebé presiza ba empregu imediatu no fó impaktu pozitivu ba sira nia moris di’ak”, Amy Nishtha Satyam konklui.
Jornalista : Felicidade Ximenes
Editór : Zezito Silva
