DILI, 27 novembru 2024 (TATOLI)–Antigu Primeiru-Ministru, Taur Matan Ruak, husu ba Governu Konstitusionál da-sia (IX) atu investe iha ema hodi bele responde ba iha dezafiu mundiál.
“Ema mak importante, entaun saida mak ita halo, ita tenki fó oprtunidade hodi moris saudavel no vida naruk. Ita investe ema iha saúde, koñesimentu iha siénsia no teknolójia, hadi’a padraun moris no ema bele moris iha prospriedade,” Taur Matan Tuak hateten ba jornalista sira liuhusi somumutu ho jornalista sira ho tema “Reflesaun loron Proklamasaun Independénsia Timor-Leste, 28 Novembru-Pasadu, prezente no futuru”, iha nia rezidénsia Faról, tersa (27 novembru 2024) ne’e.
Tuir nia, se Governu la hadi’a ida-ne’e mak iha futuru sei sai dezafiu ida-ne’ebé boot, tanba kompetisaun globál iha setór sira-ne’e makaas tebes.
Antigu Xefe Estadu ne’e sujere, atu Govermu Timor-Leste bele investe iha área agrikultura oinsá atu halo redusaun ba iha importasaun no halakon mánutrisaun ne’ebé afeta ba populasaun sira liuliu labarik no inan isin-rua sira.
Ezemplu, nia dehan, populasaun Indonézia agora hakarak ona ekonomia forte iha 2045, entaun buat ne’ebé sira halo mak dezenvolve natar ektare millaun haat (5) ba produsaun hare atu labele importa foos husi rai-li’ur.
Objetivu Estadu, nai hateten, mak seguransa no beinestar ninia sidadaun maibé Timor-Leste iha tinan 22 independénsia ne’e lakon tempu barak, envezde halo buat barak ba povu maibé Governu la halo ida-ne’e.
“Sala ne’e, sé nian. Sala ami-nian, ami sira lideransa ne’e nian. Se ita-boot sira haree dadus estatístika,” nia dehan.
Iha sezafiu boot haat (4), nia esplika, Timor-Leste iha, 47%-resin iha pobreza multidimensionál iha setór tolu mak hanesan edukasaun, saúde no rendimentu populasaun nian, no mánutrisaun iha 47% ba labarik sira no feto idade produtiva.
Taur esplika, bainhira ema mánutrisaun ne’e ninia síntoma ne’ebé mosu make ma matan dukur hela de’it, kakutak la funsiona ho di’ak no produtividade menus, tanba alimentasaun la di’ak.
“Ita iha inseguransa alimentár katak hahan laiha no sosa foos lata ida hodi han. Maibé laiha ona osan, han mak fehuk no ai-farina tanba rendimentu laiha,” nia hateten.
Nia informa, konsumu internu populasaun ba foos tonelada 132 kada tinan, produsaun tonelada mil 32 de’it hodi kKoresponde ba 30%.
Tuir nia, programa Cesta Bázika ajuda motiva ema atu halo produsaun iha rai-laran maibé ema kritika dehan subsídiu ida temporáriu.
Jornalista : Jesuína Xavier
Editór : Cancio Ximenes
