OÉ-CUSSE, 27 novembru 2024 (TATOLI)—Governu deside Timor-Leste komemora loron proklamasaun independénsia ba da-49 (28 novembru 1975-28 novembru 2024) iha Rejiaun Administrativa Espesiál Oé-Cusse Ambeno (RAEOA) iha 20 novembru 2024.
“Nu’udar foinsa’e hakarak husu ba ukun-na’in sira liuliu ba Governu ida agora ne’e, atu kria kampu traballu, harii tan eskola liuliu iha área rurál no halo Estrada. Ami iha RAEOA ne’e espesiál maibé sente estrada ne’e iha villa laran de’it, presiza hadi’a estrada ba postu sira-ne’ebé iha,” Juventude RAEOA, Agostinho Oki, hateten ba Agência TATOLI iha ámbitu komemorasaun loron proklamasaun independénsia ba da-49 (28 novembru 1975-28 novembru 2024) iha Lifau, Oé-Cusse, kuarta ne’e.
Aleinde ne’e, nia mós husu ba líder nasionál sira presiza iha unidade no hamutuk lori dezemvolvimentu nasaun ba oin.
Negsoante Ambulante iha RAEOA, Lucia Bobo, hateten nu’udár negosiante taís husu Governu dezenvolve ekonómia rai-laran liuliu promove feto envolve liután iha atividade ekonomia ba prosesu dezenvolvimentu nasaun.
Nia parte kontente tebes ho inisiativa Governu konstituisionál da-sia liuhusi Ministériu Administrasaun Estatál (MAE), Ministériu Komérsiu no Indústria (MKI) ho autoridade Rejiaun Administrativa Oé-Cusse Ambeno (RAEOA) iha komemorasaun loron proklamasaun indepedénsia ba da-49 hodi realiza feira iha Oé-Cusse hodi faan tais no produtu sira seluk, atu hetan rendimentu di’ak hodi bele apoiu nesesidade família uma laran no selu oan sira-nia eskola.
“Ami iha ne’e faan tais no selenda ema hola, hetan rendimentu di’ak, tanba bele hetan rendimentu $500 husi sosa-na’in ka vizitante sira husi Dili, Baucau, Ermera ho munisípiu sira seluk,” nia dehan.
Negosiante seluk, Adelina Freitas, espresa ninia hanoin katak maske Timor-Leste (TL) komemora loron proklamasaun independénsia ba dá-la 49 no restaurasaun indepedénsia ba da-22 ona, maibé povu barak sei preokupa asesu saúde, edukasaun no infraestrutura bázika hanesan Estrada no bee moos.
Tanba ne’e, nia husu Governu atu investe liután setór importante sira-ne’e hodi fó moris di’ak povu nian inklui tau atensaun dezenvolve ekonomia rai-laran.
Reprezentante Ema ho Defisiénsia iha RAEOA, Antanea Tane, husu Governu atu bele apoiu liután sira-nia atividade soru tais hodi hola parte iha dezenvolvimentu nasaun nian no labele husik sira hela iha kotuk.
Nune’e, nia sente kontente ho inisiativa Governu iha tinan ne’e ba komemorasaun loron proklamasaun independénsia ne’ebé realiza iha RAEOA ho atividade feira hodi promove produtu lokál inklui ninia rezultadu soru tais ne’e.
Foinsa’e feto iha RAEOA, Alexandrina da Costa, hateten dezenvolvimentu ne’ebé durante ne’e balun komesa la’o ona no iha balun seidauk la’o ho di’ak, tanba ne’e hanesan joven husu Governu tau matan liuliu iha área edukasaun no infraestrutura.
Tanba, tuir nia, iha área rurál sira-ne’e kondisaun estrada ladiak entaun difikulta populasaun sira atu asesu Estrada hodi lori sira-nia produtu ba merkadu.
“Ha’u husu kria mós kampu traballu ba joven sira, tanba durante ne’e ita preokupa tebes ho kampu serbisu,” nia dehan.
Jornalista : Nelson de Sousa
Editór : Cancio Ximenes
