OÉ-CUSSE, 28 Novembru 2024 (TATOLI) – Jestór sira iha Rejiaun Administrativa Espesiál Oé-Cusse Ambeno (RAEOA) husu ba Governu atu kontinua reforsa infraestrutura bázika, liuliu estrada rurál sira hodi fasilita komunidade asesu bá merkadu.
“Ita ukun-aan tinan 20-liu, hahú iha 2002. Ohin, ita selebra Loron Proklamasaun ba tinan 49 hahú iha 1975. Ita haree dezenvolvimentu la’o, maibé konsentra de’it iha área urbana, ida-ne’e mak ita husu Governu sei bele reforsa ba to’o baze, tanba durante atu asesu bá merkadu liuliu hanesan Pássabe, Nítibe, susar tebes”, Jestór sub-rejiaun Oésilo, Benedito Ulan, dehan iha komemorasaun Loron Proklamasaun Independénsia, iha kamu 01 de Maio Palaban, ohin.
Tuir nia observasaun, durante ne’e dezenvolvimentu la’o, maibé komunidade balun seidauk sente, tanba ne’e Governu tenke dudu dezenvolvimentu, liuliu iha setór infraestrutura bázika. “Ida-ne’e mak sai preokupasaun boot ba ita-nia komunidade sira iha baze. Kuandu udan ita labele tun mai, tanba mota no kondisaun dalan”, nia preokupa.
Jestór sub-rejiaun Pante Makasar, Lourenço da Cunha, hateten kondisaun estrada seidauk di’ak, maibé Primeiru-Ministru, Xanana Gusmão, mós ko’alia beibeik katak 2025 tinan ba dezenvolvimentu, tanba ne’e ita hein katak tenke hadi’a ona dalan, nune’e fasilita ema hotu asesu bá merkadu, liuliu iha tempu udan.
Nia dehan liga ba Loron Proklamasaun Independénsia sente satisfeitu tanba Governu deside komemora hamutuk ho povu Oé-Cusse. “Komemorasaun ne’e lori benefísiu ba povu Oé-Cusse tanba tum-tum sira hetan osan, uma sira hetan osan kuandu aluga, sasán bele folin, inklui modo tahan”, nia salienta.
Iha sorin seluk, Jestor sub-rejiaun Nítibe, Agustinho Afulit, espera katak OJE 2025 promulgadu husi Prezidente Repúblika sei ezekuta ba povu Timor-Leste nia di’ak atu kore povu husi ki’ak no mukit.
“Ita hatene suku lima [iha Nítibe] maioria estrada seidauk tama, kuandu udan fó amesa ba transporte no ema atu asesu mai Oé-Cusse Vila. Ita espera 2025 Governu hadi’a estrada sira, ne’e prioridade tanba komunidade sira atu lori sira-nia produtu bá merkadu susar tebtebes”, nia hateten.
Iha diskursu Prezidente Repúblika, José Ramos Horta, hateten nia parte konfia tanba Orsamentu Jerál Estadu (OJE) 2025 ho montante billaun $2,6 ne’ebé aprova ona ne’e sei dezenvolve Timor-Leste nia ekonomia.
“Iha dezafiu barak kona-ba setór edukasaun, saúde, agrikultura no seguransa alimentár, sub nutrisaun, buat sira ne’e hotu ita tenke tau matan. Ha’u konfia orsamentu ne’ebé aprova tiha ona me’e, iha tinan 2025 Governu sei aselera ezekusaun orsamentu dezenvolve ita-nia ekonomia”, Horta hateten iha diskursu iha komemorasaun Loron Proklamasaun Independénsia iha kampu Palaban, Oé-Cusse, ohin.
Notísia relevante: PR Horta: “OJE 2025 sei dezenvolve ita-nia ekonomia”
Jornalista: Abílio Elo Nini
Editora: Maria Auxiliadora
