COVALIMA, 28 Novembru 2024 (TATOLI) – Xefe Suku Suai Loro, Manuel da Costa, sujere ba autoridade munisipál atu selebrasaun loron nasionál sira bele hasa’e mós bandeira iha suku hodi eduka povu kona-ba loron istóriku sira.
“Ita ukun rasik-aan tinan 24 no proklama independénsia ba-49, ita akompaña iha televizaun no rádiu, lidér sira ko’alia ba osan, maibé la eduka povu kona-ba saida mak loron istóriku hanesan 28 Novembru”, Manuel da Costa hato’o iha Suai Loro, ohin.
Nia observa katak durante selebrasaun loron nasionál autoridade sira konsentra de’it iha kapitál munisípiu nian no tuir loloos líder sira presiza atu diskute hodi komemora loron nasionál iha nivel suku.
Xefe suku ne’e salienta katak kada tinan autoridade sira selebra loron nasionál iha kampu Ladi ne’ebé falta prezensa husi povu. “Ita presiza komemora loron nasionál iha suku, nune’e populasaun bele hatene loron ida ne’e, katak uluk ita-nia erói sira sakrifika sira-nia aan, ohin loron ita livre no goza”, nia fó hanoin.
Estudante UNTL, George Bragança, dehan partisipasaun iha loron nasionál hanesan 28 Novembru atu relembra hikas erói sira-nia sakrifísiu no ikus mai hetan liverdade.
“Ho ita-nia partisipasaun ita atu relembra uluk erói sira luta. Hanesan joven ita luta atu muda ita-nia rai liuhusi dezenvolvimentu. Atu dezenvolve ita-nia rai presiza liuhusi edukasaun”, George Bragança dehan.
Lembra katak loron 28 Novembru, Timor-Leste komemora aniversáriu Proklamasaun Independénsia. Iha loron ida ne’e duni, iha tinan 1975, ba dahuluk testu Proklamasaun Independénsia Repúblika Demokrátika Timor-Leste nian lee husi, Francisco Xavier do Amaral, Prezidente Repúblika dahuluk.
Jornalista: Celestina Teles
Editora: Maria Auxiliadora
