COVALIMA, 28 Novembru 2024 (TATOLI) – Estudante estajiáriu husi Fakuldade Siénsia Sosiál, Universidade Nasionál Timor Lorosa’e (UNTL) ne’ebé halo estájiu servisu sosiál iha suku Suai Loro, postu administrativu Suai, konstrui hela lixu iha sede suku ne’e.
Estajiáriu na’in-19 konstrui lixeiru ho medida 150×200 ne’e ho osan rasik no lahetan apoiu ruma husi universidade ne’ebé fó orientasaun ba sira no inaugura ona husi dosente orientadór kampu ba estudante estajiáriu, Franquelino da Costa, no xefe suku Suai Loro, Manuel da Costa.
Estudante sira ne’e halo ona estájiu hahú iha outubru no termina ohin, tanba ne’e husik hela lembransa ba komunidade Suai Loro kona-ba sira-nia prezensa iha fatin ne’e.
EstajiáriaAgusta Neusa Moniz dehan obra fízika no la’ós fízika ne’ebé estudante na’in-19 husik hela sai hanesan embransa ba komunidade Suai loro. “Durante hala’o estájiu, obra ne’ebé ami estudante estajiáriu sira halo mak konstrui fatin ba lixu, halo organograma suku, pinta ai riin bandeira iha sede suku oin, prienxe livru númeru 18 no atividade sira seluk”, nia relata.
Nia dehan estudante sira halo diskusaun ho dosente orientadór kampu mak foin halo obra fizíka ho la’ós fízika. “Ita hakarak marka istória iha suku ida ne’e hodi selebra Loron Proklamasaun Independénsia 28 Novembru ho komunidade Suai Loro”, nia dehan.
Serimónia ba komemorasaun 28 Novembru ne’e, estudante hakarak realiza iha nivel suku ho intensaun atu fó hanoin ba jerasaun foun iha baze, liuhusi atividade ida ne’e bele kuda nafatin espíritu nasionalizmu hodi hakruuk ba sakrifísiu erói sira-nia, tanba jerasaun foun labele selu maibé hatudu liuhusi asaun pozitiva sira.
Xefe suku Suai Loro, Manuel da Costa, agradese ba estudante UNTL tanba husik hela lembransa ba sira no nia valór boot tanba sei utiliza fatin ne’e hodi soe fo’er.
“Ita atu uza tanba durante ne’e iha suku Suai Loro parte iha kampu nian soe lixu arbiru de’it. Estudante uza sira-nia osan rasik kontrui soe lixu fatin ba komunidade sira”, nia realsa.
Lidér suku ne’e fó hanoin ba komunidade atu labele soe lixu arbiru, maibé tau iha nia fatin, nune’e buka kareta atu raut no fakar.
Jornalista: Celestina Teles
Editora: Maria Auxiliadora
