Governu ofisialmente entrega fasilidade agrikultura ba munisípiu Viqueque
VIQUEQUE, 29 novembru 2024 (TATOLI)- Governu liuhusi Ministériu Agrikultura Peskas, Pekuária no Floresta (MAPPF), ofisialmente distribui ekipamentu agrikultura hanesan tratór, no seluk tan ba munisípiu Viqueque hodi reforsa no fasilita povu agrikultór sira hasa’e produsaun agrikola.
Fasilidade agrikultura sira unidade 42 mak hanesan makina sama hare unidade 5, tratór ki’ik 30, makína deut batar unidade 5 no tratór boot unidade rua.
Iha distribuisaun ekipamentu agrikultura ne’e, MAPPF, Marcos da Cruz, esplika, ekipamentu agrikultura unidade 42 ne’e Governu aloka mai munisípiu Viqueque hodi ajuda povu agrikultór sira, atu redús todan ne’ebé povu agrikultór sira enfreta hanesan halo toos no natar.
“Ekipamentu sira-ne’e ha’u distribui mai kuaze fulan ida ona. Ohin maka ita foin ofisializa entrega ba autoridade no servisu agrikultura munisípiu Viqueque hodi halo jestaun ba ekipamentu sira”, Governante ne’e hatete ba jornalista sira, iha salaun munisípiu Viqueque, ohin.
Ministru Marcos reafirma, ema hotu preokupa ba ai-han importasaun, maske Timor Leste rai poténsia ba setór agrikultura, maibé produsaun sei menus.
“Maske ita rai bokur ba setór agrikultura, maibé ita-nia agrikultór sira laiha kb’iit hodi sosa ekipamentu hodi tulun sira halo toos no natar ida-ne’e maak durante ne’e sai problema ba ita-nia povu agrikultór hasoru. Dala barak ema hanoin servisu halo toos no natar ne’e fasil, la hatene katak servisu halo toos no natar ne’e todan presiza ekipamentu sira hodi ajuda servisu. Tan ne’e, mak ita kontinua apoia ekipamentu sira ne’e ba povu agrikultór sira”, dehan Governante ne’e.
Nune’e, nia husu ba PAM Viqueque no komunidade hotu atu utiliza ekipamentu agrikultura hirak ne’e ho di’ak hodi hasa’e produsaun rai laran.
Jornalista : Vitorino Lopes da Costa
Editór : Floréncio Miranda Ximenes
