DILI, 28 novembru 2024 (TATOLI)–Prezidente Autoridade Munisípiu (PAM) Dili, Gregório Saldanha, hateten loron proklamasaun independénsia unilaterál Timor-Leste iha 28 novembru 1975 ne’e nu’udar embriaun ba luta ukun rasik aan.
“Ohin, ita hotu agradese tinan 49 ba kotuk, ita-nia líder sira deside proklama independénsia mezmu unilaterál de’it. Se sira la hahú oinsá ita iha identidade bele luta hanesan tenke iha bandeira, konstituisaun 1975, estrutura governamentál, hodi ida-ne’e mak sai embriaun Estadu Timor-Leste ba luta ukun rasik aan,” Gregório Saldanha hateten ba jornalista sira hafoin serimónia isár bandeira loron proklamasaun independénsia unilateral Timor-Leste ba da-49 (28 novembru 1975-28 novembru 2024) iha resintu Prizaun becora, kinta ne’e.
Nia hateten, iha restaurasaun independénsia iha loron 20 maiu 2002 mak Timor-Leste hetan rekonesimentu internasionál hanesan nasau soberanu no iha tinan 1999 mak Indonésia sai husi Timor-Leste.
Nia hato’o agradesimentu ba luta-na’in sira-nia korajen lidera husi katuas luta-na’in sira hanesan Francisco Xavier do Amaralno ne’ebé deklara Timor-Leste nia independénsia unilaterál iha loron 28 novembru 1975.
Tuir Prezidente, independénsia unilaterál ne’e akontese tanba ne’e mak halo deklarasaun unilaterál hodi hatudu identidade Timor-Leste sai Estadu Timor-Leste ho naran Repúblika Daemorátika Timor-Leste (RDTL).
“Legalmente tama iha Dili, iha 07 Dezembru, maibé tama ona iha fronteira antes loron ne’e. Tanba ne’e, ansiozamente no obrigatoriamente tenke deside rai ne’e ha’u-nian, rai ne’e ami-nian. Ami-nia identidade mak ne’e, país independente maske nasaun seluk laiha rekoñesimentu,” nia dehan.
Tanba ne’e, nia husu ba timoroan sira hotu atu atu serbisu makaas hodi valoriza luta ba ukun rasik aan liuhusi kontribui ba dezenvolvimentu nasionál.
Jornalista : Jesuína Xavier
Editór : Cancio Ximenes
