RAEOA, 28 novembru 2024 (TATOLI)-Xefe Suku Naimeko, Postu Pante Makasar, RAEOA, Marcos Liu, sente preokupadu tanba komisaun la prepara fatin liuliu kadeira ba sira atu líder komunitária no komunidade sira tuur hodi partisipa komemorasaun loron proklamasaun independensia ba dala-49, iha loron 28 Nobembru.
“Hau lamenta tebe-tebes tanba komisaun la prepara fatin másimu ba ami atu tuur hodi partisipa seremónia importante ne’e. Ita nia komunidade ne’ebé akompaña ha’u mai ne’e laiha kadeira ida atu tuur, maibé konvidadu seluk tuur fali iha kadeira”, dehan Autoridade lokál ne’e ho triste.
Nune’e, nia husu ba komisaun atu prepara fatin dignu ba sira hodi komunidade sira bele sente komemorasaun loron importante ne’e ho di’ak.
Maske ho kondisaun hanesan ne’e, maibé populasaun Rejiaun Administrativa Espesiál Óe-Cusse Ambeno (RAEOA), kuarta ne’e, hahú nakonu iha kampu ba komemorasaun loron proklamasaun indepedénsia unilaterál ba da-la 49 (28 novembru 1975-28 novembru 2024).
Tinan ne’e, Governu konstitusionál da-sia liuhusi Ministériu Administrasaun Estatál (MAE), ho autoridade RAEOA realiza komemorasaun loron indepedénsia unilaterál ba da-la 49 (28 novembru 1975-28 novembru 2024), iha RAEOA ho tema ‘’Orgullu ba ita-nia identidade no kultura, ita harii futuru liberdade, justisa no esperansa ba ita-nia povu,’’
Tuir observasaun jornalista Ajénsia TATOLI iha tereñu dader ne’e iha kampu Palaban Óe-Cusse, kuarta ne’e, populasaun RAEOA husi sub-rejionál ha’at hanesan Pante Makassar, Oesillu, Passade, Nitibie ho suku 18 hahú prense nia fatin sira ne’ebé komisaun prepara hodi partisipa másimu iha eventu komemorasaun loron istóriku ne’e.
Tuir sekuénsia programa serimónia ofisiál sei hahú iha tuku 9:00 ne’ebé sei prezide direta husi Prezidente Repúblika (PR), José Ramos Horta no sei hato’o mós diskursu.
Entertantu, sei partisipa mós iha komemorasaun loron Primeiru Ministru (PM), Vise Primeiru Ministru I, Francisco Kalbuady Lay, Prezidente Parlamentu Nasionál, Maria Fernanda Lay, Prezidente Tribunál Rekursu, Deolindo dos Santos, membru oitavu Governu konstituisionál balun, Deputadu sira, autoridade RAEOA, inklui konvidadu espesiál husi Indonézia, populasaun RAEOA husi sub-rejionál ha’at hanesan Pante Makassar, Oesillu, Passade, Nitibie ho suku 18 no konvidadu sira seluk.
Jornalista: Nelson de Sousa
Editór: Florencio Miranda Ximenes
