OÉ-CUSSE, 28 Novembru 2024 (TATOLI) – Ministériu Administrasaun Estatál (MAE) husu ba xefe suku 18 iha Rejiaun Administrativa Espesiál Oé-Cusse Ambeno (RAEOA) atu utiliza motorizada foun ne’ebé Governu oferese ho responsabilidade no tuir regra Estadu nian.
Diretór Nasionál Apoia Administrasaun Suku iha MAE, Celestino Marques, apela bainhira hala’o distribuisaun motorizada 38 ba suku 18 iha ámbitu komemorasaun Loron Proklamasaun Independénsia ba da 49 iha 28 Novmebru iha kampu 01 de Maio Palaban, ohin.
“Motorizada sira-ne’e Governu mak sosa ho Orsamentu Jerál Estadu. Ita tenke tau xapa matríkula Estadu, tan ne’e tenke uza tuir regras ne’ebé aplika. MAE liuhusi Diresaun Nasionál Apoia Administrasaun Suku sei hasai mós sirkulár ida atu gia sira oinsá bele utiliza motór sira-ne’e. Ezemplu, uza bá servisu, labele uza ba asuntu partidária, uza ba asuntu negósiu, maibé uza de’it ba serbisu administrasaun suku nian”, afirma.
Iha tinan ne’e, MAE sosa motorizada 904 hodi apoia ba suku sira, nune’e bele hala’o serbisu ho efisiénsia no efikásia. Motorizada sira-ne’e MAE hola ho tipu tolu mak marka Verza ba xefe suku sira hamutuk 447, Beat lima ba xefe suku feto sira no Honda Beat hamutuk 452. Motorizada sira-ne’e, empreza transporta ona bá iha munsíiu sira atu disponibiliza ba autoridade lokál sira.
“Ohin, iha Oé-Cusse [fahe motór] 38 ba suku 18 no kada suku hetan rua, Verza 18 no Honda Beat 18 ne’ebé seim uza ba operasionál suku sira”, nia hateten.
Iha biban ne’e, xefe suku Costa, Francisco Colo, kontente tanba ho motór sira ne’e bele hakmaan sira-nia serbisu iha baze. Ezemplu, iha suku Costa bainhira nia atu vizita komunidade iha kada aldeia tenke uza transporte ne’e no motorizada seluk apoia ba serbisu administrasaun suku, tanba iha pesoál na’in-haat mak serbisu iha kada suku.
“Ha’u hanoin ne’e sasán Estadu, tenke uza ho responsabilidade no asegura patrimóniu ne’ebé Governu apoia ona. Kada fulan tenke haree óleu, nia roda no sasán seluk atu uza ba tempu naruk, la’ós tinan ida ka rua aat fali ona, ida-ne’e labele”, nia dehan.
Xefe suku Usitasa’e, Tomás Ulan Colo, agradese tanba motorizada sira-ne’e bele haforsa serbisu administrasaun suku nian.
“Transporte rua ne’e sufisiente ona atu uza iha serbisu suku nian, tanba durante ne’e suku iha motorizada ida de’it, entaun susar tebes atu hala’o serbisu ho lais, tanba ne’e ha’u orgullu ba Governu bele hakmaan ami-nia serbisu”, nia hato’o.
Notísia relevante: Governu entrega motorizada no uniforme ba xefe suku antes 28 Novembru
Jornalista: Abílio Elo Nini
Editora: Maria Auxiliadora
