DILI, 28 novembru 2024 (TATOLI)—Prezidente Repúblika (PR), José Ramos Horta, hateten Timor-Leste (TL) prontu tama hodi sai membru plenu ASEAN iha tinan 2025.
“Tinan 2025, ita preparadu ona prontu tama ASEAN,” PR Horta hateten iha diskursu komemorasaun loron proklamasaun independénsia ba da-49 (28 novembru 1975-28 novembru 2024) iha kampu Palaban, iha Rejiaun Administrativa Oé-Cusse Ambeno (RAEOA).
Xefe Estadu ne’e hateten, iha setembru 2024, Timor-Leste simu vizita Amu Papa Francisco ho di’ak tebes, ne’eduni atu simu ministeriál ASEAN iha TL ne’e la hakfodak.
Timor-Leste tama tiha ona Organizasaun Mundiál Komérsiu (OMK), sai membru g7+, CPLP no TL ativu iha debate asuntu mudansa klimátika no TL liuhusi nia téknika ka expert sira lidera iha Least Development Country (LDC).
“Ne’eduni, TL prontu tama ASEAN iha 2025 durante Malázia nia prezidénsia ASEAN,”
Nune’e PR husu sidadaun hotu atu kontribui ba pás iha adezaun ne’e.
“Ba ita hotu-hotu ninia kontribuisaun mak hametin dame iha rai-laran, soe violénsia hakle’an estabilidade, hakle’an demokrásia no liberdade, laiha violénsia polítika, laiha violénsia diskriminasaun relijozu, étnia ou ba defisíensia no LGBTI, rai ne’e tenke sai ezemplu duni,” nia dehan.
Jornalista : Nelson de Sousa
Editór : Cancio Ximenes
