VIQUEQUE, 28 novembru 2024 (TATOLI)- Iha komemorasaun loron 28 novembru 2024, ba dala-49 ne’e, veteranu no komunidade munisípiu Viqueque husu Governu aselera prosesu dezenvolvimentu liuliu infraestura hanesan estrada liga ba aldeia, suku no postu sira hodi povu asesu ba merkadu, eskola no fasilidade saude sira.
Veteranu Viqueque, Fernando da Costa Amaral “Siik-SE”, hateten, komemorasaun 28 novembru ba tinan ida-ne’e ba dala-49 haree ba prosesu dezenvolvimentu sei hakdasak liuliu ba estrada liga ba aldeia, suku postu sira-ne’ebé daudaun kondisaun aat hodi difikulta povu asesu ba estrada.
“Ami hakarak rekomenda ba Governu, oinsa atu aselera prosesu dezenvolvimentu infraestutura estrada sira-ne’ebé ohin loron kondisaun sei aat, buka hodi hadi’a estrada sira-ne’e, atu povu bele goja ba prosesu dezenvolvimentu ita-nia nasaun nian”, Fernando da Costa Amaral “SiiK-SE”, hateten ba jornalista sira, iha serimónia komemorasaun 28 novembru, ohin.
Veteranu Viqueque ne’e profunda, iha faze ukun rasik ne’e populasaun sira-ne’ebé moris iha área rurál maioria sira sei moris terus liu ba estrada sira atu lori produtu lokál bá merkadu.
“Nune’e, ita-nia Governu presiza tau prioridade ba estrada, tanba iha tempu udan sai problema boot povu ki’ik sira”, Nia prefere.
Iha fatin seluk, komunidade suku Bibileo, Rainato da Costa Amaral, subliña ukun rasik-an ne’e komunidade suku Bibileo halerik liu ba estrada tanba kondisaun aat.
“Ohin, ita komemora ita-nia loron proklamasaun independénsia ba dala-49 ona, maibé ami halerik liu ba estrada, bee-moos no eletrisidade. Tanba ne’e iha ambitu komemorasaun ida-ne’e ami husu ba Estadu atu tau atensaun ba ami-nia preokupasaun sira-ne’ebé ami enfreta”, nia afirma.
Iha Serimónia komemorasaun 28 novembru ba dala-49 hetan partisipa husi Prezidente Autoridade Munisípiu (PAM) Viqueque, PNTL, F-FDTL, autoridade lokál, funsionáriu, Bombeiru, Seguransa Sivil, Veteranu, Komunidade munisípiu Viqueque.
Jornalista : Vitorino Lopes da Costa
Editór : Florencio Miranda Ximenes
